Россияның Кадык камгалал яамызының уруглар кадыкшылының национал медициназының шинчилел төвүнүң делегациязы, медицина эртемнериниң кандидады, чаштар хирургу, улуг эртем ажылдакчызы Татьяна Прудникованың удуртулгазы-биле Тывага келгеш, бичии уругларга кезиишкин кылыр эмчилерниң мергежилдиин бедик үнелээн:
"Чурттуң өске регионнарында амдыызында сайзыраваан кезиишкинниң биче-инвазивтиг хевирлерин Тывада чаштар хирургтары кылып турар. Кылып турар кезиишкиннериниң хөй кезии бедик технологтуг болуп турар. Эргежок чугула дериг-херекселдер бар болза, силерниң хирургтарыңар чаа төрүттүнген чаштарга база биче-инвазивтиг кезиишкиннерни кылып болур".
Чазак Даргазының оралакчызы Орлан Сарыглар-биле кады баштайгы хүннүң түңнелдерин үндүрүп тура, келген эксперттер республиканың бичии уруглар хирургтарының командазының соруктуун демдеглээннер. “Команда кончуг эки-дир, сайзыраар, ажылдаар чүткүл бар. Сонуургал бары көскү, карактары чырып турар” – деп, улуг эртем ажылдакчызы Алексей Корольков демдеглээн.
Эки күзээшкиннер, сагындырыглар бары чугаажок. Электроннуг система киирериниң дугайында айтырыгларны, телемедицина дузазы-биле эмчи сүмезин бээрин, бичии болгаш элээди уруглар аразынга суицидти баш удур болдурбас дээш, уругларга психиатрның болгаш психологтуң дузазын чедирер дугайында айтырыгларны сайгарып чугаалашкан. Ол ышкаш Тывада ада-иениң чөпшээрели-биле уругларга хөйү-биле тестированиени база чорудуп турар.
Эмнер-биле эмнээр, лабораторлуг шинчилелдер организастаар талазы-биле практиктиг арга-сүмени педиатр эмчи, невролог, биче эртем ажылдакчызы Елена Кулик берген. Республиканың 1 дугаар эмнелгезинге бичии уругларга кезиишкин кылыр салбырлыг аңгы хирургтар албанын организастаары чугула дээрзин эксперттер демдеглээн.
Ийи кезиишкин залдары турар уруглар эмнелгезиниң тудуун кылыр ажылдар эгелей бергенин кадык камгалал сайыды Анатолий Югай дыңнаткан. Эмнелгениң чаа оран-савазы ажылдай бээрге, маршрутизация планын эки ажылдап кылырын сүмелээн. Тудугну 2 чыл дургузунда тудар деп баш удур санап турар.
Бөлүк эксперттер Республиканың 1 дугаар эмнелгезиниң бичии уругларның хирургия салбырының болгаш Республиканың уруглар эмнелгезиниң ажылы-биле таныжып көрген.
Олар Россияның бүгү регионнарында бичии уругларның эмнелге албан черлерин, эксперттиг үнелелди шынарлыг чорудуп тургаш хөгжүдер, методиктиг дуза кадар, эки талалыг дуржулгазын көвүдедир сорулгалыг Россияның регионнарында эмчи дузазының шынарын үнелээр талазы-биле төлевилелге кызыгаарланып чедип келгеннер.
/ Чыжыргана СААЯ белеткээн.
"Шын" №29 2023 чылдың апрель 22
