Октябрь 7 - 9 хүннеринде Иркутск хоорайга ушу-саньда хевирге бүгү-россия чергелиг «Азия Кубогу» турнир болуп эрткен. Аңаа Россияның 250 ажыг шыырак спортчулары киришкен. Оларның аразынга Тывадан 9 хардан 18 харга чедир киришкен 14 спортчунуң 13-ү шаңналдыг черлерни чаалап алгаш, чайынналчак чедиишкиннерлиг чанып келген.
27-ден 65 килге чедир кил аайы-биле Тываның спортчуларының 2-зи - бирги черниң шаңналын, 7 спортчу - ийиги черни, 4 спортчу - үшкү черге төлептиг болган. Тывадан 3 уруг боттарының килинге ийиги черни чаалап алганнар.
Команда аайы-биле Тываның командазы 3-кү черни алгаш, шыырактар аразынче кирген.
Сагындырып каар чүүл - Тывада ушу спортунуң хевири шагда-ла сайзырап эгелээн-даа болза, бо чылдың август айда “Чеди-Хаан” аттыг аңгы ушу школазы ажыттынган. Ол Кызылдың дугаары 17 дугаар школаның базазында турар.
Бист. корр.
