Ленинград, Оренбург, Свердловск, Архангельск, Ростов, Томск, Еврей автономнуг областтардан, Красноярск, Ставрополь крайлардан, Хакас болгаш Карелия республикалардан база Москва хоорайдан башкылар Тывада чедип келген.
Келген башкылар бо чылын Россияга үш дугаар болур класс удуртукчуларының Бүгү-российжи шуулганынга киржирлер. Тывада болуп эгелээн Бүгү-российжи башкылар экспедициязын ооң мурнунда болган шуулганның киржикчилериниң идеязы болгаш саналы-биле планнаан турган.
Олар Тываже келир бетинде кожавыста Хакас Республиканы таварааш, аңаа база тус черниң этниктиг культуразын болгаш туризмче угланган шинчилелдиг экспедицияны эрттиргеннер. Тывада келген аалчылар чүгле турисчи маршруттар болгаш аян-чоруктар-биле кызыгаарланмайн, тус черниң башкылары-биле ажыл-агыйжы ужуражылгаларны база планнап турар. Чыглып келген класс удуртукчулары бичии класстың өөреникчилерин патриотчу чоруккка өөредиринден эгелээш, Россияның аныяк башкыларының грант программазынга киржилгезиниң ажыктыынга чедир, эң-не чидиг айтырыгларны чугаалажыр.
Башкыларның билиин бедидер институтка дүүн болган семинарга келген аалчылар киржип, кижизидилге ажылынга хамаарышкан арга-дуржулгалары-биле үлешкен. Чижээлээрге, Архангельск областың Красноборск суурда Красногорск ортумак школазының эге класс башкызы Людмила Жгилеваның «Сан кичээлиниң чижектеринде Ада-чурттуң Улуг дайыны» деп бижээн чыындызының дөрткү классчыларга кайы хире ажыктыын дээш өске-даа башкыларның солун илеткелдерин семинарның киржикчилери улуг сонуургал-биле дыңнаан.
ТР-ниң өөредилге сайыды Елена Хардикова бо экспедицияның түңнелинде чаа солун идеялардан ажыктыг төлевилелдер үнер дээрзинге идегеп турар.
Бо чылын үш дугаар болур класс удуртукчуларының Бүгү-российжи шуулганынга киржир дээш, Тывадан чагыг киирген башкыларның саны 690 чеде берген. Ук хемчег Москва хоорайга октябрь айның эгезинде болур.
ТР-ниң Чазааның медээлеринден А. ОНДАР белеткээн.