Кызылдыӊ 15 дугаар лицейиниӊ командазы Бүгү-российжи спортчу фестивальга мөӊгүн медаль-биле шаӊнаткан.
«Баштайгыларныӊ шимчээшкини» – ниителелдиӊ хөгжүлдезинге үлүг-хуузун киирип, аныяктарны болгаш уругларны хаара тудуп чоруур хөй-ниити организациязы. Ол чаа-ла, 2022 чылдыӊ чайын тургустунган-даа болза, Бүгү- российжи спортчу фестивальды организастаан.
Спортчу фестивальдыӊ түӊнел маргылдаалары май 18-21 хүннеринде Татар Республиканыӊ найысылалы Казань хоорайда «Урам» деп экстрим-паркка болуп эрткен. Бүгү чурттуӊ аӊгы-аӊгы регионнарындан келген 1000 ажыг школачылар аңаа киришкен.
Тываныӊ өөреникчилери спортчу фестивальдыӊ шыдыраа маргылдаазынга Сибирь Федералдыг округтуӊ өмүнээзинден киришкен. Чүге дизе Кызылдыӊ Н.Н. Макаренко аттыг 15 дугаар лицейиниӊ командазы Тыва Республика болгаш Сибирь федералдыг округ чергелиг ийи онлайн маргылдаага тиилээш, 1-ги черни төлептии-биле чаалап алган.
Александр Куулар, Арина Иргит, Анастасия Ооржак, Тимур Иргит деп бичии спортчуларныӊ командазын Ада Ким-ооловна башкы удуртуп турган.
Команданыӊ капитаны Александр Кууларныӊ кырган-ачазы Валерий Николаевич Куулар аныяк шыдыраачыларны деткип, Казань хоорайга болуп эрткен маргылдаага барып киржиринге боттуг ачы-дузаны чедирген.
Тываныӊ алдарлыг эмчизи, шыдыраа талазы-биле мастерниӊ кандидады Валерий Куулар өзүп олурар салгалды төлептиг кижилер кылдыр өстүреринге болгаш шыдырааны сайзырадырынга үлүг хуузун шак ынчаар киирген дээрзин Тывада «Баштайгыларныӊ шимчээшкини» онзалап демдеглээн.
Р. ДЕМЧИК белеткээн.
#РДДМ #РДДМТыва #ДвижениеПервых #ПроектыДвижения #Шынсолун #Медээлер
