2023-2024 чылдарда республикага 11 чаа школаны ажыглалга киирер ужурлуг. Каа-Хем, Сукпак, Балгазын, Бай-Хаак, Кызыл-Хая, Чодураа суурларда, Чадаана хоорайда, Кызыл хоорайныӊ Вавилин ээптээ биле Спутник микрорайоннарында, Кечил-оол, Бай-Хаак кудумчуларында чаа школаларны тудуп турар.
Социал объектилерниӊ тудугларында ажыл-иштиӊ кайы хире шуудап турарын Тываныӊ Баштыӊы Владислав Ховалыг боду барып четкеш, хынап турар.
«Ийи тудуг объектизин хүлээнип алган тудуг организациязы чагыг ёзугаар кылган ажылын дужаарынга беленин көргүскен. Кызылдыӊ Бай-Хаак кудумчузунда школаныӊ даштыкы ажылдары доозулган. Кызыл кожууннуӊ Сукпак суурда тудуг ажылдары адакталып турар. Ам чүгле ооӊ иштин каастап шимээр. Өөредилге ажылынга эргежок чугула бүгү дериг-херекселди садып алган. Ажылчыннар класстарже эт-септи киирип салып, столоваяныӊ техниктиг эдилел-херекселин эптээринге белен.
Кызылдыӊ Вавилин ээтпээнде, Таӊды кожууннуӊ Балгазын суурда тудуп турар школаларныӊ дериг-херекселин, эт-севин декабрьда киирер. Дужаарынга белеткеп турарывыс дөрт объектиде чылыг дамчыдылгазын болгаш электри энергиязын кожуп каан.
Бо дөрт объектини дужааптарывыска, регионда үш муӊ школачыныӊ өөренир олуду бар болур. А чеди школаны келир чылдыӊ төнчүзүнге чедир доозуптарывыска, дөрт муӊ олут немежи бээр. Федералдыг деткимчениӊ ачызында бис социал инфраструктураны чаартып, немеп ап турар бис» — деп, Тываныӊ Баштыӊы Владислав Ховалыг социал четкиде блогунга бижээн.
Р. Демчик белеткээн
![](https://sun4-17.userapi.com/impg/XXwPgThuZ80uYcaH9KYaHrfOvQDTCsRlPrGHKw/bMmxrXXpUr8.jpg?size=807x523&quality=95&sign=103b6bd4fc7da5ae20cc4858332eceab&c_uniq_tag=G4rb8qC4UcK1OA0Umg2UAxcmQJ1OtehX-xDjFHG1wXM&type=album)
![](https://sun4-19.userapi.com/impg/jOvCIbti8Q-FIugSrCjdVnVBxRDQ533Tyn2PUA/x_1DM1X5jTQ.jpg?size=807x584&quality=95&sign=71765d079f984001a236a9ef8a0b331b&c_uniq_tag=_15IAtr24X8Qi1g9VVc_k5FpfDU00WFjgE2P5_hFsUw&type=album)
![](https://sun4-20.userapi.com/impg/EosQlLVYIKsDMWWPEoHx1tW8An_d4aE1nnl-ng/weyh-ufoqH0.jpg?size=807x523&quality=95&sign=12bd96680079dad12664e258a89b89f9&c_uniq_tag=iH64w81WYQMXH-geYdnFc3DaMX7tuolk9aM2bgX4W9s&type=album)
![](https://sun4-22.userapi.com/impg/FFJ-FfpfsXSAsQpr2BqEUyY1xRDHRLVO6obiBA/HzBVlWdHXdE.jpg?size=807x468&quality=95&sign=9b4357581d4118f24884b53d7affd9c1&c_uniq_tag=UgZYPyMUz86XQNe_tpO-tkfuKgvmgG4ACCy4c_qGAx4&type=album)
![](https://sun4-21.userapi.com/impg/bmtYpWlxdXWhQrubG1cRr8mGFGGZ41JWNqnZeg/ugXh5_6qs1Q.jpg?size=807x511&quality=95&sign=f853fecaaebbbfc46c506854eb66cae4&c_uniq_tag=98Vqkk-uwx7ZkXFJiCTRWsHHL2ONAgC8fXjF4KsxcFY&type=album)
![](https://sun4-17.userapi.com/impg/hJsBqwkzPlieRT0wfGcOCVy65DI1JeXKN2MWmw/J1X8K87u77I.jpg?size=807x537&quality=95&sign=6cc7c421cbba596bd77ca36151550130&c_uniq_tag=cGMqGrCjWq3MNGoQtojcGZGsu1vhPkFhY5JFS7dGZwM&type=album)
![](https://sun4-18.userapi.com/impg/BeW1bEWDfiFsoq_QgAc8XOAPvfgc9BfnMohfAA/cy1Axci49mg.jpg?size=807x586&quality=95&sign=7063b759dc18a6c091a77bbdaee18d47&c_uniq_tag=l04sK9qgpwIubnWANsb55slwrtvIdxx4J4XrMnelFPM&type=album)