Август 21-де Тываның улуг бүдүрүлге черлери 120,7 муң стерлядь байлаңнарын Боом дааның чанында Улуг-Хемче киир салган. 2018 чылдан эгелээш чылдың бо үезинде Улуг-Хемче стерлядь байлаңнарын салыры чаңчыл болу берген.
Байлаңнарның деңзизи бир грамм, бирээзиниң-не өртээ 700 рубль. Балыктың үүргене салыр үези 6–7 чыл болгаш эгелээр. Дөрт-беш чыл болгаш амгы байлаңнар ийи метр чедир өзүп, деңзизи 95 кил чеде бээр. Стерлядь – аар өртектиг, үнелиг балыктарга хамааржыр. Бойдустуң суг курлавырының когаралының орнун катап тургузар ажылды моон-даа соңгаар уламчылаары планда көрдүнген.
Байлаңнарны анаа эвес август айда салып турар. Чүге дээрге стерлядь июнь айда өзүп, көвүдээр. Соок үелерге чедир байлаңнар күш кирип, өзер ужурлуг.
Байлаңнарны Абаканның Белоярск балык заводундан Кызыл хоорайже тускай изиг-соок эрттирбес, сугну кислород-биле хандырып турар система кожуп каан савага эккелген.
Бистиң корр.
"Шын" №62, 2023 чылдың август 23