Бо хүннерде юбилейлерин демдеглеп турар Улуг-Хем кожуунда кышка белеткел ажылдары кандыг чоруп турар дугайында ук кожууннуң чагырыкчызының бирги оралакчызы Уран Серин дыңнаткан.
Улуг-Хем кожууннуң девискээринде автономнуг котельнаяларлыг 29 албан чери бар, оларның 10-у культура, 10-у өөредилге албан черлери база 9-у көдээ суурларның чагыргалары.
2023 чылдың сентябрь 4-түң көргүзүү-биле чылдың 2-ги чартыының хөмүр сөөртүлгези ам-даа эгелевээн. Тываның даг-руда компаниязындан штрих-кодтарны алган соонда, ынчан хөмүр-дашты сөөртүп эгелээр. Чаңгыс-ла хандырыкчы компанияга чүгле төлевирни кылган соонда, ынчан штрих-кодтарны бээр. Амгы үеде кожууннуң өөредилге болгаш культура албан черлеринде хөмүр-даш дээш чарган керээлер езугаар төлевир ажылдары чоруп турар.
Кожуунда печка одаар чер бажыңнарның саны — 3803. Чер бажыңнарның чылда хөмүр-дашка хереглели ниитизи-биле 25 961,42 тонна. Шагаан-Арыгга — 14 704,1 тонна, Арыг-Бажынга — 663,9 тонна, Арысканга — 598,3 тонна, Арыг-Үзүүнге — 1536,5 тонна, Иштии-Хемге — 779,07 тонна, Ийи-Талга — 878,4 тонна, Торгалыгга — 1734,05 тонна, Хайыраканга — 2623,7 тонна, Чаатыга — 1151,5 тонна, Эйлиг-Хемге — 1291,9 тонна.
Шагаан-Арыг хоорайның хөмүр складын август айда «ТСП» МУБ-туң складынче дамчыдары-биле республика балансызынче шилчиткен. Август 28-тен тура хоорай складының девискээринде септелге ажылдары чоруп турар. Ооң-биле чергелештир бо неделяда чурттакчы чонга садар хөмүр-дашты база дажып эгелээр. Бо хүнде «ТЭК-4» башкарыкчы компанияның Шагаан- Арыг участогунуң план езугаар белеткели 79 хуу.
Чедери берге Эйлиг-Хем сумузунче хөмүр-даш сөөртүлгези 100 хуу күүсеттинген.
Шагаан-Арыг хоорайның чуртталга фондузунуң болгаш «Алдыы-Шынаа» МУБ-туң одалга сезонунга белеткели 78 хуу күүсеттинген. Чаа одалга сезонунга чуртталга фондузунуң объектилеринде чылыг болгаш суг хандырылгазының белеткел ажылдары эгелээн. Кожууннуң одалга сезонунга белеткел ажылдарынга ниитизи-биле 7078,65 муң рубль түңнүг 123 хемчегни чорударын планнаан.
Амгы үеде чуртталга фондузу болгаш «Алдыы-Шынаа» МУБ-туң 60 хемчээниң 47-зи күүсеттинген, ол 78,0 хууну тургузуп турар.
Кожуунда ниитизи-биле 14 культура албан чери бар. Шупту культура албан черлеринге септелге ажылдарын чоруткан, кышка белеткели 100 хуу.
Өөредилге албан черлериниң белеткели база 100 хуу (август 28-тиң көргүзүү-биле). Өөредилге албан черлеринге чылдың ээлчеглиг септелгелерин чоруткан, шупту котельнаяларны чугайлааш, ыш үндүрер хоолайларын аштап-арыглаан. Социал албан черлериниң күскү-кышкы үеде беленин хынаар комиссия график езугаар суурлар болгаш хоорайның өөредилге албан черлерин хынааш, эки деп үнелээн.
Улуг-Хем кожууннуң социал объектилерин август 10–11 хүннеринде хынаан түңнелинде, бо хүнде 57 объектиниң 39-зу, ол дээрге 68 хуузу, кышка белен деп паспортту алган.
Бистиң корр.
№66 «Шын» 2023 чылдың сентябрь 6