Апрель 26-да Россияның өрттен камгалал албанының 375 чылын демдеглеп эрттирген.
Тываның өртке удур камгалал адырының төөгүзү улуг төөгүнүң база бир чугула кезээ болур. Тыва Арат Республиканың ССРЭ-ниң составынче эки тура-биле киргенинден бээр 80 чыл оюнда аңгы-аңгы адырларның, албан черлериниң хөгжүлдезиниң эгезинден тура турган бистиң улуг өгбелеривистиң улуг күш-ажылын демдеглээри бистиң хүлээлгевис дээрзин Тываның Баштыңы Владислав Ховалыг бодунуң блогунда демдеглээн.
Амгы үеде Россияның ОБЯ-зының Тыва Республикада кол эргелелиниң тургузуунда күрүнениң өртке удур албаны айыыл чок чорук системазының чугула звенозу болур. Республикада хүннүң-не 22 өрт кезээ эрес-дидими-биле ажылдап, оларга 44 эки турачы өрт командалары дузалажып турар. Республикада өртке удур улуг хемчээлдиг профилактиктиг ажылдарны чорудуп, хөй ажы-төлдүг өг-бүлелерже онза кичээнгейни угландырып, өрт айыылындан камгаланыр талазы-биле хемчеглерни демниг организастап эрттирип турары дээш Тываның Баштыңы Владислав Ховалыг өртчүлерге социал четкиде өөрүп четтиргенин илереткен.
Шагаан-Арыг хоорайның 17 дугаар өрт-камгалал кезээн Шагаан-Арыг хоорайның котельнаязынга болган онза байдал үезинде эки түңнелдиг ажылдааны дээш шаңнап-мактаан. Ооң начальниги Айдың Ооржак айыыл-халап үезинде аңаа турган ажылдакчыларны канчаар камгалап турганын чугаалаан: “Өрт айыылы болган черге чеде бээривиске, административтиг оран-саваның 4 дугаар кадында 4 кижи боттары шимчээр харык чок болган. Газ болгаш ыштан камгалаар албандан 2 кижини чоруткан мен”.
Айыыл-халапты узуткаары-биле, Улуг-Хем кожууннуң өрт-камгалал горнизонундан шупту 26 кижини, Кызыл хоорайның авария-мобильдиг бөлүүнден, оперативтиг бөлүүнден 7 кижини хаара тутканын Айдың Ооржак демдеглээн.
Чыжыргана СААЯ.
Чуруктарны ТМГ-ден алган.
“Шын” №32 2024 чылдың апрель 27
