Тыва үндезин культура төвүнге Улусчу фронтунуң регионалдыг конференциязы болуп эрткен. Аңаа национал төлевилелдерниң Тывада боттанылгазының мониторингизи болган.
Хемчегге ТР-ниң Баштыңы Владислав Ховалыг база Улусчу фронтунуң төпчүткен күүскомунуң төлээлери Ирина Родина болгаш Егор Смирнов база кээп киришкен.
Чурттаарынга таарымчалыг хоорай хүрээлеңи, чуртталга-коммунал ажыл-агый, экология, кадык камгалалы, өөредилге болгаш эртем, культура адырларында национал төлевилелдерниң боттанылгазының дугайында ук адырларның төлээлери илеткелдерни кылган. Оон аңгыда, конференция үезинде Улусчу фронтунуң Тыва Республикада даргазының хүлээлгезин күүседир кылдыр ТР-ниң Дээди Хуралының депутады Аяс Мөңгени соңгаан.
ТР-ниң Баштыңы Владислав Ховалыг Улусчу фронтунуң тургустунганындан бээр 10 чылдаан ою-биле чыылган чонга байыр чедиргеш, «Бүгү чүүлдү тиилелгеже!» деп төлевилелдиң киржикчилеринге өөрүп четтириишкинниң бижиктерин болгаш Путинниң командазы аттыг шаңналдарны тывыскан.
Тыва Республиканың Каратэ федерациязының президентизиниң оралакчызы, Азербайджан диаспораның даргазы Чингиз Алиевке, Тываның политехниктиг техникумунда хөй ажыл-чорудулгалыг төптүң удуртукчузу Александр Буланкинге, Ада-чурттуң дайынчыларының өг-бүлелериниң комитедин удуртуп турар Айлана Дан-Сюрюнге, ТР-ниң Садыг-саарылга палатазының эвилел даргазы Владимир Журавлевка, ТР-ниң Медицина палатазының даргазы Анджела Канчыыр- оолга, ТР-ниң Дээди Хуралының депутады Аяс Мөңгеге, Кызыл кожууннуң «Эврика» немелде өөредилге төвүнүң педагогу Кара Ондарга, «Ажыл-агыйжы Россия» хөй-ниити организациязының Тывада регионалдыг салбырының даргазы Мерген Санчай-оолга, ТР-ниң Дээди Хуралының депутады Эрес Хууракка, «Улусчу фронт. Чончу полк» регионалдыг төлевилелдиң координатору Александра Шагировага «Улусчу фронт. Бүгү чүүлдү тиилелгеже!» төлевилелге идепкейлиг киржип, тускай шериг операциязында киржип турар шериглерже чорудар гуманитарлыг дуза чыырынга идепкейлиг киржилгези дээш өөрүп четтириишкинниң бижиктерин тывыскан.
Улусчу фронтунуң Тыва Республикада штавының даргазы Сергей Белоусовка, Бүгү-российжи улусчу фронтунуң Тывада күүсекчи комитединиң удуртукчузу Саима Далчинге, Тываның ойнаар-кыстар театрының директору Станислав Ирильге, «Буянныг чүректиглер» аныяктар шимчээшкининиң удуртукчузу Артыш Моңгушка, Тываның В.Ш. Көк-оол аттыг Национал хөгжүм-шии театрының директору Саян Моңгушка, Таңды кожууннуң Бай-Хаак суурнуң Спорт школазының директору Михаил Оюнга, ТР-ниң алдарлыг артизи Галина Сюрюнга, «Олимп» олимпийжи курлавырлар школазының директору Владимир Тулушке, Кызылдың М.А. Бухтуев аттыг 1 дугаар школазының директору Татьяна Шарыпова оларга чонунуң амыдыралынга улуг үлүг-хуузун киириштирип, төрээн чуртунга бердинген чоруу дээш «Путинниң командазы» деп хүндүлел бижиктерни тывыскан.
Айдың ОНДАР.
Чингис СААЯНЫҢ тырттырган чуруктары.
“Шын” № 86 2023 чылдың ноябрь 11
