Тываның Баштыңы Владислав Ховалыг Россияның кадык камгалал сайыды Михаил Мурашко-биле видеохарылзаа таварыштыр республиканың уруглар эмнелгезиниң тудуунга хамааржыр айтырыгларны чугаалашкан.
Баштайгы төлевилелде тудугнуң чамдык чүүлдеринге даштыкыга бүдүрген инженер материалдарын ажыглаары көрдүнүп турганындан, амгы үеде ол болдунмас апарган. Ынчангаш регионалдыг Кадык камгалал яамызы документини эде кылгаш, катап чөпшээредип, күрүне экспертизазын эрттиреринче катап чорудар деп шиитпирлээн.
Владислав Ховалыг республиканың уруглар эмнелгезиниң чаа оран-савазының тудуунче эдилгелер кииреринге бүрүн билиишкинни, тудуг ажылдарынга деткиишкинни федералдыг сайыт Михаил Мурашкодан алган.
Ийи тала тургустунган байдалдан үнер чаңгыс аай шиитпирни тыпкан. Оран-саваның каъдын кызырары эң таарымчалыг арга ол деп бодалга келгеннер. Ындыг болзажок эмнелгениң шөлүн кызырбас болганнар. «Амгы турар эмнелге тудуглары-биле кады ол бүдүн эмнелге комплекизи апаар» — деп, Владислав Ховалыг демдеглээн.
Регионалдыг Кадык камгалал яамызының эде кылган төлевилелинге күрүне экспертизазының түңнели келир чылдың февральда болу бээр.
Төлевилел езугаар аңаа 150 оруннуг эмнелге туттунар, регионалдыг Кадык камгалал яамызы ынаар республиканың 1 дугаар эмнелгезиниң уруглар кезер салбырын көжүрерин планнаан.
ТР-ниң Чазааның парлалга албаны.
«Шын» №77 2023 чылдың октябрь 11