Тываның Баштыңы эрткен дыштаныр хүннерде Кызылда республиканың уруглар эмнелгезиниң тудуг шөлүнге четкен. «Кадык камгалал инфраструктуразын хөгжүдери» федералдыг төлевилел ёзугаар ажыл чоруп турар. Стратегтиг албан чери 2028 чылда бир дугаар аарыг уругларны хүлээп эгелээр ужурлуг.
Владислав Ховалыг ооң мурнунда кадык камгалал албан чериниң тудуунуң чорудуун Президент Владимир Путинге илеткээн турган.
«150 орунга санаан комплекс тудуу шалыпкын чоруп турар. Келир үеде тудугга педиатрия болгаш психоневрология, ол ышкаш анестезиология, реанимация, интенсивтиг терапия салбырлары ажылдаар. Ол ышкаш республиканың 1 дугаар эмнелгезиниң уруглар хирургиязы база ынаар көжүп кирер» — деп, Владислав Ховалыг MAХ-та бодунуң каналынга хыналда соонда дыңнаткан.
Тудугжулар чыл төнчүзүнге чедир тудугнуң ханаларын болгаш крышазын доозуп, чылыг системазын ажылдадып, шеверлел ажылдарын доозарын планнаан. Ниити шөлү 15 муң ажыг дөрбелчин метр эмнелгеге үш педиатрия салбырлары, ол ышкаш психоневрология, хирургия, анестезиология, реанимация болгаш интенсивтиг терапия салбырлары турар.
Владислав Ховалыг чаа албан чери бедик шынарлыг диагностика болгаш стационар эмчи дузазын көргүзер чер апаарын чугаалаан. Эмнелгеге чыдары планнаттынган база дүрген эмчи ачы-дузазы негеттинип турар аарыг кижилерни база хүлээп алыр.
А. МОНГУШ.
Чурукту ТР-ниң Чазааның парлалга албанындан алган.
“Шын” №21 2026 чылдың июнь 4
"Шын" солуннуң МАХ-каналынга каттыжыңар: max.ru/join/egenQ...