Күс дүшкен. Даштын сооп эгелээн. Одаар ыяш болгаш хөмүр-даш айтырыы чонну дүвүредип эгелээн. Эрткен чылын хөмүр-даштың бөдүүн чонга чедишпестеп турганын барымдаалааш, QR-код-биле хөмүр-даш садып алыр тускай программаны ТР-ниң Одалга болгаш энергетика яамызы ажылдап кылган.
Чаа программа-биле Кызыл хоорайның чурттакчылары хөмүр-дашты садып ап эгелей берген. Кожууннарда ук айтырыг канчаар шиитпирлеттинип турарын билип алыр дээш, Өвүр кожууннуң чагырга даргазының чоннуң амыдырал-хандырылга талазы-биле оралакчызы Милада Донгак-биле харылзаштым.
Милада Донгактың медеглээни-биле алырга, Өвүр кожууннуң төвү Хандагайты сумузунда чаңгыс хөмүр-даш склады бар. Кожуунда ниитизи-биле алды суму бар. Төпте хөмүр-даш складындан колдуунда Солчур биле Хандагайты сумуларының чону одаар чүүлдү садып алыр, а арткан сумуларже хууда сайгарлыкчылар сөөртүп турган. Ам QR-код-биле хөмүр-даш садып алыр чаа программа кииргени-биле бичии өскерлиишкиннер болур. Чонга таарымчалыг байдалдарны тургузар дээш, чогуур ажылдарны ажылдап кылып эгелээн. Сентябрь 11-ден эгелээш QR-код-биле хөмүр-дашты чон садып ап эгелей берген.
Хөмүр-даш складында бо хүнде 150 тонна одаар чүүл белен бар. Чыл дургузунда 9 муң тонна чедир кожууннуң төвүнде хөмүр-даш складынга одаар чүүлдү Чадаананың болгаш Кызылдың хөмүр-даш уургайларындан сөөртүрү планда көрдүнген. .
А.ОНДАР.
Милада Донгактың тырттырган чуруу.
"Шын" №70 2023 чылдың сентябрь 16