Октябрь 23-те Тыва Республиканың шериг комиссариадынга шеригже келдирткен оолдарның чыскаалының мурнунга чугула российжи дайынчы шаңналдарның бирээзи – Жуковтуң медалын халажылгада биче сержант Виктор Ондарга байырлыг байдалга тывыскан.
Сүт-Хөл кожууннуң Бора-Тайга суур чурттуг Виктор Юрьевич Ондар 2016 чылда Тываның күрүне университедин чедиишкинниг дооскаш, келдиртилге езугаар шериг албан-хүлээлгезин эртер деп шиитпирлеп алган. Шериг хүлээлгезин Челябинск обласка эрттирген, аңаа ол хайгыылчы-чолаачының шериг уран чүүлүн шиңгээдип алган.
Халашкан соонда аныяк оол хамааты мергежили-биле ажылга тургустунуп алырын бодаан, ынчалза-даа ийи чыл эрткенде, шериг албан-хүлээлгеже эглип келир деп шиитпирлээн. Бо удаада керээ үндезининге.
Шериг мергежилин өөренип көргеш, Викторну чолаачы-гранатометчунуң албан-дужаалынга томуйлаан. Керээзиниң үезинде сонуургак дайынчы миномет болгаш пулемёттан боолаарын шиңгээдип алган. Тускай шериг операциязын чарлапканда, ол шиңгээдип алган мергежилдери биче сержантыга аажок дузалаан.
Баштайгы шыңгыы тулчуушкун Виктор Ондарга Украинаның Чернигов облазынга болган, ынчан россий коллона баш буруңгааргы кедегге таварышкан. Аар куяктыг техниканы эрттирипкеш, дайзын хандырылганың чиик куяктыг техниказын чылча шавар деп бодаан. Ынчалза-даа дайзынның күзели боттанмайн барган, российжи шериглер шыырак удурланыышкынны көргүскен. Бир шак үргүлчүлелдиг тулчуушкуннуң түңнелинде, бистиң шериглер шыырак белеткелдиг бажы каткан украин шериглерни узуткааш, тос дайзынны тудуп алганнар.
Ооң соонда Викторнуң дайынчы намдары Северодонецкиден Кызыл Лиманга чедир уламчылаан, аңаа гранатометчу-чолаачы бодунуң чиңгине шериг мергежилинге шылгарап, балыглаткан эш-өөрүн дайын шөлүнден көжүржүп, миномёт-биле дайзынның шавар халдаашкынын кезе шапкан.
Чүгле чиик бертиниишкиннерни санаваска, изиг-изиг тулчуушкуннарның үезинде Виктор чаңгыс-даа балыгланмаан.
Шериг керээзиниң хуусаазы доозулган соонда, Виктор Юрьевич төрээн чуртунче эглип кээп, Кызыл хоорайның бир школазында дооскан эртеми-биле ажылдап турар.
Тыва Республиканың шериг комиссариадының материалдарындан
А. ХЕРТЕК белеткээн.
“Шын” № 85 2023 чылдың ноябрь 8
