Удавас болур Президент соңгулдаларынга Владимир Путинниң кандидатуразын деткиири-биле, ат салыр ажылдарны организастаарын Улусчу фронтунуң Тывада регионалдыг салбыры уламчылавышаан. Республиканың чурттакчы чону В. Путинниң кандидатуразын деткип, ат салыр дээш, келгеш, волонтерлар апарып турар.
Төөгүнүң болгаш культураның тураскаалдарын кадагалаар хөй-ниити шимчээшкининиң идепкейжилери январь 12-де деткимчезин көргүзүп келгеннер. Ук шимчээшкинниң удуртукчузу Ульяна Бичелдей Владимир Путинни деткип келгеш, баштайгы волонтерларның бирээзи болган.
«Тыва – РФ-тиң эң-не онзагай, ховар культурлуг өнчү-хөреңгилиг субъектилериниң бирээзи. Владимир Владимирович Путинниң ооң мурнунда удуртулгазының үезинде Россияның бүгү регионнарының, оларның иштинде Тываның база, сайзыралы дээш сагыш човаашкынын ооң ажыл-херектеринден көрдүвүс. РФ-тиң аңгы-аңгы чоннарының национал өнчүзүнге хумагалыг хамаарылгазын билип алдывыс» – деп, У. Бичелдей чугаалады.
Ол ышкаш Төөгүнүң болгаш культураның тураскаалдарын кадагалаар хөй-ниити шимчээшкининиң идепкейжизи Омак Ондар бодунуң деткимчезин көргүзүп келген. Ооң демдеглээни-биле алырга, Владимир Путинниң удуртуп турган үезинде «Россия күштүг күрүне апарган» – деп, ол санап турар. Ол дээрге РФ-тиң удуртулгазы-биле амгы үеде нептерей берген БРИКС болгаш Шанхай дугуржулгазы дээн ышкаш делегей чергелиг каттыжыышкыннарның тургустунганы болуп турар.
«1990 чылдар-биле амгы үени деңнээр болза, чер биле дээр дег. Мээң студентилеп турган үелеримде, амгы шагның аныяктарында дег, трамплиннер турбаан. Ынчангаш келир үениң шимчээшкиннери дээш бурунгаар» – деп, ол немээн.
Тыва Республикада Улусчу фронт Кызыл хоорайның Тыва эки турачылар кудумчузунуң 3 дугаар бажыңында эртенгиниң 10.00 шактан кежээ 18.00 шакка чедир дыштаныр хүннер чокка ажылдап турар. Улусчу фронтуга баарда, паспорттуг болуру чугула.
А. ОНДАР.
Буян ООРЖАКТЫҢ тырттырган чуруктары.
"Шын" №2 2024 чылдың январь 13
