Тываның Баштыңы Владислав Ховалыг Москвага Россияның чырыдыышкын сайыдының оралакчызы Андрей Николаев-биле ужурашкан. Тыва бодунуң мурнунда хөлчок идээргек-даа бол, кончуг чугула сорулгаларны салган. Ооң бирээзи 2024 чылдың төнчүзүнге чедир он бир школаны ажыглалга киирери болур. Оларның дөртүн бо чылын-на белениниң шугумунче киирер. Ындыг кыска үениң дургузунда кым-даа мооң мурнунда республикага тудугларны дужаавайн келген.
Ужуражылганың дугайында Тываның Баштыңы мынчаар бижип турар:
“Кызылда, Сукпакта, Вавилин ээтпээнде, Балгазын суурда өөредилге черлериниң тудуу озалдаашкын чок чоруп турар дээрзин Андрей Викторовичиге дыңнаттым.
Ук тудугларны бодумнуң дорт хайгааралымда алган мен. Тургустунуп келген бергедээшкиннерни керээлиг организация-биле кады шалыпкын шиитпирлеп турар бис. Бо өөредилге чылының үшкү улдуңунда оларга өөредилге чорудулгазын эгелей бээрин кызыдып турар бис. Тудугну доозуп, дөрт школаны ажыглалга киириптеривиске, регионга үш муң өөредилге олуду тургустунар.
Тывада чоннуң саны доктаамал өзүп турарын Андрей Викторович демдегледи. Өөредилге инфраструктуразының чаартылгазы – школаларның, уруглар садтарының, техникумнарның тудуу база септелгези регионга эргежок чугула херек. Ынчангаш бис РФ-тиң Президентизиниң эгелээшкини-биле боттанып турар программаларга идепкейлиг киржип турар бис. Бо өөредилге чылының бетинде чер-черлерде 13 школаны үндезини-биле септедивис. Сентябрь 1-де уруглар чаарттынган школаларда парталар артынга олурар аргалыг болган. Ам туттунуп турар школаларга мооң мурнунда көрүп көрбээнивис ажылчын күштер хаара туттунар — 1000 ажылчын болгаш 95 кезек техника. Тудугнуң төлевилээшкини болгаш тудуг ажылдары канчаар чоруп турары – үзүктел чок контрольда” — деп, Тываның Баштыңы соцчеткилерде бодунуң арынынга бижээн.
А. ХЕРТЕК белеткээн.
Чуруктарны интернеттен алган.
«Шын» №73 2023 чылдың сентябрь 27