Январь 13-те Кызылдың Аныяктар өргээзинге ТР-ниң Чазааның деткимчези-биле Тываның Журналистер эвилели Россияның парлалга хүнүнге тураскааткан байырлыг хемчегни организастап эрттирген. Аңаа тыва журналистиканың хоочуннары болгаш республиканың МИЧ-тиң ажылдакчылары киришкен.
Байырлыг хемчег эгелээр мурнунда регионнуң профессионал журналисчи каттыжылгазының 2023 чылда чидириглери – аравыстан чарлып чоруткан хоочун журналистер Тываның алдарлыг ажылдакчызы, “Шын” солуннуң кол редакторунга ажылдап чораан Светлана Монгуш, Россияның хүндүлүг радио ажылдакчызы, “Тыва” КТРК-ның хоочуну Александра Монгуш болгаш ол-ла компанияның телебашкарыкчызы Артур Чымбал-оолдуң чырык адынга сактыышкын минутазын эвилелдиң даргазы Э. Лифанова чарлаан. Ооң соонда 2024 чыл ТЖЭ-ниң тургустунганындан бээр 65 чыл болган юбилейлиг чылы дээрзин дыңнаткаш, бо чылдың апрель айда аңаа хамаарышкан байырлыг хемчеглерге эвилел белеткенип эгелээн деп чугаалаан.
Журналистерниң профессионал байырлалы-биле ТР-ниң Чазак Даргазының мурнундан ооң оралакчызы Алик Монгуш чыылганнарга байыр чедирген:
“Чуртта болуп турар болуушкуннарга хамаарыштыр чонга чедирер медээлерниң шынныг болуру журналист кижиниң сөзүнден улуг хамааржыр болганда, бо белен эвес мергежилде ажылдап чоруур силерниң харыысалгаңар улуг дээрзин билип турар бис. МИЧ ажылдакчылары хөй чон мурнунда ажылдап чоруур болганыңарда, оларның силерге бүзүрели улуг. Ынчангаш чонга чедирип чоруур медээлериңерден чурттуң социал-экономиктиг хөгжүлдезин экижидери-биле эрге-чагырганың кылып чоруур ажыл-ижиниң үнелели, политиктиг байдалы, ооң турум чоруу болгаш ниитилелдиң эрге-чагыргага бүзүрели дорт хамаарылгалыг. Ындыг болганындан ниити чурттуң хөгжүлдезинге журналист мергежилдиң ролю улуг” – деп, Тываның Чазак Даргазының оралакчызы чугаалаан.
Журналистерге профессионал байырлалы-биле ТР-ниң күш-ажыл болгаш социал политика сайыды Эдуард Сандан, чурагайлыг хөгжүлде сайыды Идегел Монгуш, ТР-ниң культура сайыдының оралакчызы Сергей Монгуш болгаш ТР-ниң Арга-арыг ажыл-агыйының, Орук-транспорт яамыларындан дээш өске-даа албан черлеринден төлээлер байыр чедиргеннер.
К.Б. Ондар аттыг Тыва үндезин культура төвүнүң директорунуң оралакчызы Меңги Ондар сөс алгаш, тыва чоннуң ёзу-чаңчылдары, культуразы болгаш ус-шеверлер дугайында чонга медээ чедиреринге республикада кара чаңгыс тыва дылда үнүп турар “Шын” солуннуң ролю улуг болганын демдеглээш, редакцияның ажылдакчыларынга четтиргенин илереткен.
“Баштайгыларның шимчээшкини” Бүгү-россия чергелиг хөй-ниити организациязының Тывада салбырының удуртукчузу Эртине Куулар уругларның болгаш аныяктарның патриотчу кижизидилгезинге хамаарышкан чырыдыышкын ажылынга журналистерниң киирип чоруур үлүг-хуузу улуг дээрзин демдеглээш, чайның изии, кыштың соогу дивейн, дүн-хүн чок ажылдап чоруур журналистерге хөй-ниити организацияның эмблемазын чураан чылыг хөйлеңнерни тус-тузунда тывыскан. 2024 чылда ук организация МИЧ ажылдакчыларының аразынга чогаадыкчы мөөрейни чарлап турарын дыңнаткан.
Ол хүн болган байырлыг хемчегге шылгараңгай ажылы дээш хөй журналистер аңгы-аңгы чаданың шаңналдарын алганнар. Россияның Чурагайлыг хөгжүлде яамызының Хүндүлел бижии-биле “Тувинская правда” редакциязында солун өрүкчүзү Юнона Чооду, ТР-ниң Чазак Даргазының өөрүп четтириишкин бижии-биле “Тыва” КТРК-ның кол бухгалтери Валентина Адыг-Тюлюш, ол-ла компанияның бүдүрүлге-техниктиг килдизиниң даргазы Сылдыс Куулар шаңнаткан. Оон аңгыда, аңгы-аңгы яамылардан, албан черлеринден шаңнал алганнар хөй болган. Ол-ла хөй шаңналдардан ылгалдыг болган чүүл, ТЖЭ-ниң ном саңының эң-не идепкейлиг номга ынактары – ТЖЭ кежигүннери, “Тувинская правда” солундан Юлия Манчин-оол, “ТываМедиаБөлүк” холдингиден фотограф Буян Ооржак олар тускай шаңналды болгаш журналист эш-өөрүнүң хүндүткелин чаалап алганнар.
Болган хемчегге хөйге билдингир “Тыва” бөлүү чыылганнарга аян тудуп, улам байырланчыг шинчи киирген. Хемчег соонда кофе-брейк үезинде үрде көрүшпээн журналистер аралажып, ижин-кара чок хөөрешкеш, тарааннар.
Сорунза МОНГУШ.
А.ЛАМАНЫҢ, О. ВОРОНАНЫҢ тырттырган чуруктары.
“Шын” №3 2024 чылдың январь 17
