2021 чылдан тура эгелээн кадык камгалалының баштайгы эмчи дузазын чедирер черлерни чаартыр программа езугаар Барыын-Хемчиктиң Бижиктиг-Хаяда, Каа-Хемниң Бүрен-Хемде база ФАП-тар тудуун доозар аргалыг болган. Таңдының төп кожуун эмнелгезинге, Чаа-Хөлдүң, Бай-Тайганың уруглар поликлиникаларынга капиталдыг септелгени кылган.
Бажыңнарында аарыг улуска эмчи дузазын чедиреринге көрдүнген автомашиналарны Бай-Тайга, Каа-Хем, Кызыл, Бии-Хем, Тес-Хем, Эрзин кожууннарның төп эмнелгелери болгаш Барыын-Хемчик, Чөөн-Хемчик, Улуг-Хем кожууннарның эмчиниң муниципалдыг төптери алган.
Оон аңгыда чаа үеге дүүштүр кылган, кончуг нарын эмчиниң 81 дериг-херекселин аңгы-аңгы эмчи организациялары алган. Ооң аразында MALDI Biotyper деп сөөктүң тургузуун хынаар рентген аппарады, өкпеже агаар хандырылгазын чорудар аппарат, AGFA DR100 деп кабина чок көжүп чоруур рентген аппарады дээш өске-даа.
Бист.корр.
