Чаа үеге дүүштүр кылган эмчиниң дериг-херекселдери, нарын аппараттары-биле дерээн көжүп чоруур комплекстерниң дузазы-биле Тываның 2 муң ажыг чурттакчылары эмчи шинчилгезин эрттип ап турар.
Маммография болгаш флюорографияның чурагайлыг аппараттарын “Камаз” автомашиналарында таарыштыр дерээн чылдагааны, республиканың чедери берге суурларынче орукка шаптараазыннарны чайлыг эртип шыдаар, адаа бедик боорга, албан –биле ол машиналарны шилээн. Оларның дузазы-биле 2021 чылдың ноябрь, декабрь айларында Барыын-Хемчик, Таңды, Кызыл кожууннардан 2 муң ажыг кижи эмчи шинчилгезин эртип алган.
Сагындырып каалы, “Кадыкшыл” национал төлевилел-биле республикага “Камаз” автомашинада дерээн бир мобилдиг маммография болгаш ийи ФГ-аппарат келген. Көжүп чоруур эмчи комплекстерин Республиканың хөй-ниитиниң кадыкшыл болгаш аарыгларга удур баш бурунгаар ажыл чорудар төвүнге ажыглаары-биле дамчыдып берген. База бир ФГ-аппаратты Барыын-Хемчиктиң төп кожуун эмнелгезинге берген.
2021 чылдың ноябрь, декабрь айларында бо көжүп чоруур ФГ-аппараттың ачызында 1916 кижи шинчидип алыр аргалыг болган, оларның 39-зунга улаштыр эмчи шинчилгези негеттинип турарын илереткен.
Көжүп чоруур чурагайлыг маммография аппарадының дузазы-биле 324 кижи эмчи шинчилгезин эрткен. Оларның аразындан 14 кижиниң эмиинде ыжыктар бары илерээн. Бо аарыг улуска улаштыр ханы эмнээшкин чорударын эмчилер сүмелээн.
Көжүп чоруур эмчиниң диагностиктиг комплекстери график ёзугаар ажылын ам-даа уламчылаар. ФГ болгаш маммографиядан аңгыда фельдшер-акушер комплекстери база бар. Бо бүгү ажылды ырак-узак, чедери берге суурларда чурттап турар чоннуң кадыын быжыктырарынче угландырган.
К.Монгуш белеткээн.
#Путин #президент #ВладиславХовалыг #инициативыпрезидента #нацпроекты #нацпроектздравоохранение
