Тываның эмчилери чаа чылдың эгезинден эгелээш, чедери берге талыгырда кыштагларда малчыннарга эмчи шинчилгезин болгаш диспансеризацияны чорудары-биле үнүүшкүннерни уламчылап эгелээн.
Эмчилерниң бригадаларынга ырак-узак черлерже үнүүшкүннер кылырынга көжүп чоруур фельдшер-акушер пунктулары дыка дузалыг болуп турар. Шак ындыг автомашиналарны эрткен чылдың сентябрь айда “Кадыкшыл” национал төлевилелдиң иштинде кирип турар “Баштайгы эмчи-санитар дузазын чедирериниң системазын сайзырадыры” программа-биле Тыва алыр аргалыг болган.
Республиканың хөй-ниитиниң кадыкшылы болгаш аарыгларга удур ажыл чорудар төвү 2021 чылдың дургузунда Кызыл хоорайның аңгы-аңгы организацияларынче 15 үнүүшкүннү кылгаш, ажылдакчыларга массалыг эмчи шинчилгезин чоруткан. Ынчан 264 херээжен эмчи шинчилгезин эрткен. Оларның 55 хуузунда аңгы-аңгы аарыглар бары илерээн. Улаштыр эмчилээри-биле 130 херээжен эмчи сүмезин алган, 37 кижини кольпоскопияже, биче көп-белдирин чедир хынадыры-биле 35 кижи улаштыр эмчилээр болган. Чоруткан эмчи шинчилгезиниң түңнели-биле алырга, гинекологтуг аарыглар аразында вульвит биле цервицит колдап турар болган.
Мөңгүн-Тайга кожууннуң эмчилери чедери берге кыштагларда малчыннарже үнүүшкүннерни көжүп чоруур ФАП-тар дузазы-биле кылып, кыштың соогу, чайның изии дивейн ажылдап чоруур кадарчыларның кадыының байдалын хынап, эмчи дузазын чедирип турар. Шак ындыг, дугуй кырында эмчи бригадазы кожуун девискээринде 12 малчын аалдарны кезээн. Түңнелинде, 70 кижи эмчи шинчилгезин эрткен. Коронавирус аарыынга удур катап база тарылганы 50 кижи, гриппке удур 20 кижи тарыдып алган.
Чеди-Хөл кожуунга шак-ла ындыг дугуй кырында көжүп чоруур эмчи бригадазы 112 кижиге эмчи шинчилгезин чоруткан. Ол бригадага терапевт, педиатр, акушер-гинеколог эмчилер ажылдаан.
Сагындырып каар чүүл, “Кадыкшыл” национал төлевилел-биле Тывага 16 көжүп чоруур “Газель” автомашинада долузу-биле дерээн ФАП-тар келген. “Садко” маркалыг, берге оруктарга хостуг халыыр машинада дерээн ийи ФАП-ты Мөңгүн-Тайга болгаш Тере-Хөл кожууннарга берген. Оларның дузазы-биле эмчилер чоннуң кадыкшылын быжыглаар ажылын бедик деңнелде кылып турар.
К. МОНГУШ.
#Кадыккамгалалы #Кадыкшыл #Националтөлевилел #Тыва #Тува #Шынсолун #Тывадыл #Тывамедээ #Tuva #Shyntuva
