Тывада социал керээ чединмес өг-бүлелерге база чааскаан арткан хамаатыларга адрестиг дуза чедирериниң кол аргазы болур. Социал камгалалдың органнары биле өг-бүлениң аразында дугуржулгага дүүштүр күрүне оларга деткимчениң янзы-бүрү хевирлерин көргүзүп турар: чаңгыс удааның болгаш ай санының төлелгелери, ажылга тургустунуп база өөренип алырынга дуза чедирилгези.
«2020 чылда Өвүр кожууннуң Ак-Чыраа суурда Алдына Базыр-оол күрүнениң деткимчези хевирлиг 250 муң рубль түңнүг социал төлевирни алган. Ооң-биле ол ала-чайгаар шөе тыртар оверлокту, дааранылга машиназын, бус генераторун болгаш дааранырынга эргежок чугула дериг-херекселдерни садып алгаш, бодун боду ажыл-биле хандыртынган кижи кылдыр бүрүткедип алган. Ооң соонда ол «Алдын чүскүк» деп идик-хеп даараар, септеп-селиир ательени ажыдып алган» - деп, Өвүр кожуунда Чонну ажылга хаара тудар төптүң директору Айыраа Куулар чугаалап турар.
«Биске эң-не ужур-дузалыг төлевилелдер – кожууннуң, оон туржук республиканың экономиказының хөгжүлдези-биле холбашкан төлевилелдер болур. «Демография» национал төлевилелдиң иштинге социал керээниң дузазы-биле деткимче көргүзери дээрге-ле, хамаатыларның амыдыралының деңнелин база шынарын бедидери-дир. Мындыг таварылгаларда күрүне чүгле акша-төгерик-биле дузалап эвес, а кижиге бодун болгаш өг-бүлезин хандырар дериг-чепсекти берип турар” - деп, Өвүр кожууннуң чагырга чериниң оралакчы даргазы Чодураа Шойдан демдеглеп турар.
Алдына Базыр-оол – аажок ус-шевер кижи. Чаңгыс сууржуларының болгаш кожууннуң чурттакчыларының киирген чагыгларын ёзугаар национал идик-хепти даарап турар. Септеп-селиир чагыглар база хөй: курткаларның болгаш плащтарның тыртыын солуур, улуг улустарның база уругларның чүвүрлерин, идик-хевин кызырар дээш оон-даа өске.
«Чагыглардан аңгыда, чаа чылдың дыштаныр хүннеринде көдээ культура бажыңынга тыва тон быжар, даараар мастер-класстарны эрттирдим. Ону суурнуң херээженнер чөвүлели-биле кады хөй ажы-төлдүг өг-бүлелерге организастадывыс. Чыылганнар хөлчок кичээңгейлиг дыңнап, өөренип ап турар боор чорду. Арга-дуржулгамның чамдык чажыттары-биле база үлештим, дааранып чоруурларга олар ажыглаттына бээри-даа чадавас” - деп, дааранылга ательезиниң херээжен ээзи чугаалап турар.
Алдына Базыр-оолдуң чижээ ак-чыраажыларга шынап-ла өөредиглиг. Күрүнениң деткимчезиниң ачызында ажылгыр, соругдаанынче чүткүлдүг кандыг-даа кижи бодун боду хандырып, төрээн суурунуң хөгжүлдезинге үлүг-хуузун киирип болур дээрзин олар шынзыгып көргеннер.
А. ХЕРТЕК белеткээн.
