Республиканың дугаары бир эмнелгезиниң консультация-диагностика поликлиниказында чаа үеге дүүштүр кылган Lunar Prodigy деп сөөктүң тургузуун хынаар рентген аппарадын салган. Тывага кажан-даа туруп көрбээн бо эмчиниң чаа дериг-херекселиниң өртээ 10 сая рубль болуп турар. Ону кадык камгалалының баштайгы чадазын чаартыры программа-биле садып алыр аргалыг болган.
ТР-ниң Кадык камгалал яамызының херел болгаш инструменталдыг диагностика талазы-биле штаттан дашкаар кол специализи Эртине Куулар шак ындыг бедик технологиялыг аппарат Тывада бир дугаар кээп турар деп, чугаалаан.
Чаа үеге дүүштүр кылган аппарат сөөктүң минералдыг тургузуун, ооң сыйлып болур хире айыылын баш бурунгаар билип, шинчилээринге көрдүнген.
Дөңмек сөөгүнүң чиңге кезээ сыйлыр чорук - хөй кезиинде улуг назылыг улустуң бертинер аарыы. Бо чаа денситометр ындыг таварылгада сөөктүң тургузуун билип алырындан аңгыда, сөөктүң узунун хемчээптер болгаш кижи барып дүшкенде, кайы хирени ууптар күштүүн баш бурунгаар шинчилептер аргалыг.
Бо рентген денситометр чурукту кончуг тода болгаш шынарлыг кылдыр тырттырар. Сөөктүң тургузуун, эң бичии кезээнден эгелээш, бүрүнү-биле көргүзүптер.
Сагындырып каар чүүл, кадык камгалалының баштайгы чадазын чаартыры программа-биле 2021 чылда Тываның эмчи организацияларынга чаа үениң дериг-херекселдери 80 чедир келген. Оларның ниити өртек-үнези 113, 5 сая рубль. Камналгалыг кезии-биле республика девискээринде чаа ФАП-тарга 33 чаңгыс эмчиниң дериг-херекселин садып алыр аргалыг болган.
#Модернизация_первичного_звена_здравоохранения #Денситометр #Минздрав_Тувы
