Малчын тыва чоннуң национал байырлалы Наадымга тураскааткан он сес хар чедир назынныг 128 аныяк мөгелерниң аразынга хүреш маргылдаазы Совет Тыва аттыг стадионга дүште 2 шактан эгелээш, кежээ 6 шакта доозулган. Республиканың эң шыырак аныяк мөгелерниң аразынга сегиржип алыышкыннар чидиг болгаш чараш болган.
Чидиг спортчу демиселдиң түңнелинде Эрзин кожууннуң аныяк мөгези Намчаа Сүгдер шүүлген. Чөөн-Хемчик кожууннуң мөгези Айзан Самбый-оол үжүүрлешкен. “Наадым-23-түң" хүрежинге тергиидээн мөгеге 150 муң рубль акша шаңналын тывыскан. Үжүүрлешкен мөге 70 муң рубль акша шаңналын алган. Эң шыырак сес мөгениң аразынче киир хүрешкен мөгелерге база акша шаңналдарын тывыскан.
Чараш хүрешкен мөгелерни шаңнаан. Эң чараш арганы ажыглааны дээш, Сүт-Хөл кожууннуң аныяк мөгези Аяс Сарыгларга тускай шаңналды тывыскан.
Малчыннар Наадымынга тураскааткан хүреш маргылдаазы тыва хүреш улам сайзырап, бедик арга-мергежилдиг мөгелер аныяктарның аразында барын көргүскен.
Бистиң корр.
