Тывада Бүгү-российжи Улусчу фронтунуң салбырының кежигүннери эмнелге ажылдакчылары Луганск болгаш Донецк улус республикаларда шериг албан-хүлээлгелиглерге ачы-дуза кылдыр ээлчеглиг бөлүк эм-таң аймаан чоруткан. Ук ачы-дузаны “Бүгү чүүлдү Тиилелге дээш!” деп төлевилелдиң аайы-биле тускай портал дамчыштыр чыып турган.
“Бис, эмчилер, дайынчы байдалдарга эм-таң аймааның база балыг-бышкын шарыыр материалдарның кайы хире чугула херек болуп турарын эки билип турар бис. Ынчангаш Республиканың 1 дугаар база 2 дугаар эмнелгелеринден эш-өөрүм-биле кады бирги дуза чедиреринге херек эм-таң аймаан чыып алган бис. Чаңгыс-даа кижиниң амы-тыны канчаар-даа аажок үнелиг болур болгай, бо бүгү чыып алганывыс эм-таң аймаа, ачы-дуза дайынчыларывыстың амы-тынын алырынга дуза болур” – деп, Республиканың 2 дугаар эмнелгезиниң улуг эмчизи Шолбан Күжүгет дыңнаткан.
“Бүгү чүүлдү Тиилелге дээш!” деп төлевилелди Улусчу фронтунуң идепкейлиг кежигүннери дайынчы корреспондентилер, блогерлер болгаш өске-даа ат-сураглыг кижилерниң ажыл-чорудулгазын чурумчудар болгаш калбартыр база ДУР биле ЛУР чурттакчыларын деткиир ачы-дуза чыыр сорулга-биле чогааткан.
“Мында балыгланган таварылгаларга ажыглаар шупту чүүлдер бар: бактерияларга удур ажыглаар эм-таң, күштүг антибиотиктер, гормоналдыг, хан доктаадыр эмнер, антисептиктер, бинт аймаа дээш оон-даа өске. Балыгланыышкыннар хир-чам болгаш инфекцияланган болур дээрзин эки билип турар бис” – деп, Республиканың 1 дугаар эмнелгезиниң рентгенэндоваскулярлыг кезер эмчизи Сылдыс Ондар чугаалаан.
Кылан-оол Конгар 4 ай ишти ЛУР биле ДУР-га эки турачы эмнелге ажылдакчызы болуп ажылдаан. Ооң ажылчы кол чепсээ – эмчи рюкзагы турган. Тулчуушкун шөлүнге бир дугаар эмчи дузазын ол чедирип турган. Кылан-оолдуң даг камгалакчызы мергежили улуг дузаны чедирген, ынчангаш Кылан-оол эмнелге ажылдакчызы апарганы ол.
“Шак мындыг чугула болуушкунга киржип турарымга өөрүп тур мен. Бо, шынап-ла, дыка херек эм-таң аймаа-дыр. Тулчуушкун шөлүнге дайынчыларга, госпитальдарга дыка ажыктыг. Республика эмнелгелериниң удуртукчуларынга ачы-дуза чедиргени дээш өөрүп четтирдим. Бодум база шыдаар шаам-биле эм-таң аймаан эккелдим” – деп, ол медеглээн.
Келир неделяда ачы-дуза чүъгүн чедер черинче чорудуптар ужурлуг, улаштыр ДУР биле ЛУР девискээринде эмнелге черлеринче оларны хувааптар.
/ Ч. Кашпык-оол.