Бо чылгы Наадымның болгаш Тыва Республика хүнүнүң байырлыг ажыдыышкыны Хүреш стадионунга болуп эрткен. Ажыдыышкын ёзулалы малчыннар чурту Тываны алгап мактаан ыры-шоорлуг болгаш танцы-самныг көргүзүг-биле эгелээн. Ооң соонда кожууннарның болгаш хоорайларның төлээлерин байырлыг ажыдыышкынга уткуп ап, оларның ажыл-ижин алгап йөрээп, Наадым байырлалы-биле чечен-мерген аас-сөстүг байырны чедирген.
Россияның болгаш Тыва Республиканың туктарын туткан, чүгүрүк аъттар мунган аныяк эрлер “Хүреш” стадионну долгандыр халдып, “Хостуг чоргаар Тыва, чүгле бурунгаар, бурунгаар” деп сөстерлиг ыры чаңгыланып үнүп, Россияның болгаш Тываның ыдык ырларын оркестр ойнай бээрге, Наадымның байырлыг ажыдыышкынынга келген улустуң тура-соруу улам көдүрлүп турган.
Улуг Наадымның “Хүреш” стадионда салган саңын кыпсырынче Тываның Баштыңы Владислав Ховалыгны болгаш Тываның ат-алдарлыг кижилерин чалаан. Наадым саңын кывыскаш, Владислав Ховалыг Тываның ажыл-ишчилеринге, малчыннарга Наадым болгаш Республика хүнү-биле байыр чедирип, оларның күш-ажылчы чедиишкиннерин демдеглеп, белен эвес ажыл-ижинге чедиишкиннерни күзээн.
Наадым үезинде уран чүүл программаларын, спортчу маргылдааларны, мөөрей оюннарны көрүп, аңаа киржип, мага хандыр дыштанып алгаш, улам тура-соруктуг ажылдаарын малчыннарга Владислав Ховалыг күзээн.
“Наадым – 23-түң" байырлыг ажыдыышкыны уран чүүл программазы-биле уламчылаан.
Бистиң корр.