Республиканың девискээринге май айга чедир хар чагган. Май 2–3 дүнезинде Тываның тайгаларының кырынга хар чагган. Мөңгүн-Тайга болгаш Бай-Тайга кожууннарга хар шынаа черлерже безин, киир чаапкан. Цаган-Шибети, Шапшал сыннарның эдээнге харның кылыны дискек чедир, шынааларга кажык хире болган. Ынчангаш республиканың девискээринге май айның баштайгы чартыындан ыңай үеде улуг суг үери болурунуң байдалы бар.
Үер үезинде оруктарга камгалал болгаш септелге ажылдарынга республиканың орук-транспорт комплекизи база белеткенип турар. Кайы оруктарның кайда участоктары үер суунга хөме алдырып болурун баш бурунгаар тодараткан. Оруктарга озал-ондактыг байдал үезинде камгалал-септелге ажылдарынга ажыглаар 140 санныг тускай техниканы белеткээн, каяа бергелер тыптып кээр болдур, ынаар машина-техниканы шалыпкын ажыглаарының оперативтиг планын тургускан.
Суг үеринге удур камгалал ажылдарын баш бурунгаар күштелдирериниң дугайында чугааны республиканың болгаш кожууннарның эрге-чагыргалары 2022 чылдан бээр чорудуп келзе-даа, сумуларның девискээринде хемнерге үер суун эриктерде чурттакчылыг черлерге, тараа болгаш ногаа шөлдеринге айыыл чок кылдыр эрттирериниң талазы-биле хемчеглер албаанының барымдаалары илереп турар. Тыва Республиканың Арга-ыяш ажыл-агый яамызының сугдан камгалал ажыл-чорудулга килдизиниң ажылдакчылары Элегес хемниң унунда үерден камгалал объектилерин хынап, үер суу чара агып болур эриктерни көрүп чорааш, Чеди-Хөл кожууннуң Чал-Кежиг сумузунуң девискээринде камгалал чалды үерге удур белеткевээнин, ону үер буза азып болурунуң айыылы барын илереткеннер.
/ Шаңгыр-оол МОҢГУШ.
"Шын" №33 2023 чылдың май 6
