Үш ай бурунгаар Тывага медицинаның үстүнден адаанга чедир ижиктирип киирген медээлээшкин системазын (ВИМИС) ажылдадып киирген. Шак ынчалдыр Тываның Регионалдыг чүрек-дамыр төвүн ниити-федералдыг четкиге кошкан, ооң түңнелинде мында аарыг кижилерни чурттуң национал шинчилел институттары эмнеп, хайгаарап турар.
ВИМИС – ол дээрге “Кадык камгалалы” национал төлевилелдиң иштинге регионнарның медицина системазынче “Кадык камгалалынга чаңгыс аай чурагайлыг хевирни тургузары” угланыышкын-биле ижиктирип киирип турары мурнакчы технологиялар болур.
Республиканың Кадык камгалал яамызының дыңнатканы-биле алырга, Тывага ВИМИСти ижиктирип киирериниң ээлчеглиг чадазының шенээшкини бөгүн доозулган. Ону онкология, акушер-гинекология база неонаталдыг адырларның системазынга ижиктирген. Специалистер чедиишкинниг кожуп доосканының соонда, ВИМИСтиң үлетпүр ажыглалының системазынга кожар чөпшээрелди бээриниң дугайында чагыгны Россияның Кадык камгалал яамызынче чоруткан.
ВИМИСтиң системазынче аарыг кижиниң дугайында бүгү медээ-дыңнадыгны киирер: аңаа чедиртинген эмчи дузазының хемчеглериниң, ооң аарыглар төөгүзүнүң дугайында. Аарыг кижини эмнеп турар эмчиге туржук, адыр аайы-биле национал эртем-шинчилел институттарының ажылдакчыларынга ук медээ-дыңнадыглар чедингир болур.
Тываның Регионалдыг чүрек-дамыр төвүнүң удуртукчузу Херелмаа Монгуш ВИМИС системазының эптиин демдеглээн: «Бистиң эмнедикчилеривис эмчиниң талазындан кичээнгейлиг болурун негээрлер, ындыг болганда, федералдыг кураторларның талазындан хайгаарал чугула болбайн аан. Ооң-биле чергелештир, биске коллегаларывыстан үнелиг сүмелерни чогуур үезинде алыр арга-шинектиг апаар бис. А системаның үстүнде турар бедик деңнелдиң эмчилеринге чүгле аарыг кижиниң дугайында медээ-дыңнадыгларже киргеш, болур-чогуур чүүлдерни уштуп алыры артып калыр».
Артур Хертек очулдурган.
Чурукту интернетен алган.
