Чаш ажы-төл төрүттүнер талазы-биле Тыва Россия Федерациязында мурнуку одуругда чоруп турар республика дээрзи билдингир болгай. Ынчангаш бичии уругларны шуптузун садиктер-биле хандырарының айтырыы дыка берге. Чаш салгалдың төрүттүнүп көвүдээринге уруглар садтарын тудары четтикпейн келген.
Тыва Республикага уруглар садтарының тудуунче кичээнгейни Россияның эрге-чагыргазының үстүкү органнары база шыңгыы угландырып турар. Бир талазында, ол дээрге тус черниң чурттакчылары база аңаа идиг бергени деп болур. Кызыл хоорайның чурттакчызы Инга Ховалыг Россия Федерациязының өөредилге сайыдынга билдириишкин киирген соонда, Кызыл хоорайда 23 дугаарлыг уруглар садының тудуун Россияның Чазааның курлавыр фондузундан акшаландырар болгаш 2021 чылдың декабрь 31-ге чедир ажыглалга киирер талазы-биле хемчеглерни ап чорудар талазы-биле ажылдар планнаттынган.
Россия Федерациязының Чазааның Даргазы Михаил Мишустин бо чылдың чазын Тывага чорааш, садиктер тударынга 86 миллион 948 муң рубль акшаны үндүрүп берип, дузалаарын аазаан.
Тыва Республиканың Баштыңы – Чазааның Даргазы Владислав Ховалыг республиканың бирги удуртукчузунуң албан-дужаалынга ажылдап эгелээш-ле, уруглар садтарының тудуунче улуг кичээнгейни угландырган. Бо чылдың частан күске чедир уруглар садтарының тудугларынга ийи-үш удаа чедип, ажылдарның кандыг темпилиг чоруп турарын болгаш шынарын хынаан. Олар дээрге Кызыл хоорайның Бай-Хаак кудумчузунда уруглар садтарының тудуу болгаш «Спутник» микрорайонда “Демография” национал төлевилел ёзугаар туттунган 280 уруг турар «Угулза» дээш өске-даа уруглар садтары-дыр.
Тудугжулар-биле ужуражып, уруглар садтарын кезип көрген соонда, тудуг ажылдарын улам дүргедедир, хыналда үезинде эскерттинген четпестерни дарый чайладыр талазы-биле даалгаларны Тываның Баштыңы Владислав Ховалыг тудуг организацияларының удуртукчуларынга берген.
“Иркутск” микрорайонда комплекстиг тудуг төлевилели республиканың удуртулгазының онза кичээнгейинде. Бо микрорайонга 5-7 каът хөй квартиралыг бажыңнарны тударындан аңгыда, бирээзинге-ле 280 бичии чаштар турар 2 уруглар садын база тудар ужурлуг.
Найысылал Кызыл хоорайга 2021 чылда ниитизи-биле 5 уруглар садын ажыглалга киирер сорулга салдынган. Оларның тудуу кандыг чоруп турарын Тываның Баштыңы сөөлгү катап октябрь 13-те хынаан.
Ооң дугайында Владислав Ховалыг социал четкиде бодунуң арынынга: “Оларны доктааткан хуусаада ажыглалга киирери чугула, ону Чазактың оралакчы даргазы Александр Брокерт биле тудуг сайыды Аяс Хунай-оол утпас ужурлуг. Россияның өөредилге сайыды Сергей Кравцов биле тудуг болгаш чуртталга-коммунал ажыл-агый сайыды Ирек Файзуллинниң башкарып эрттиргени координация чөвүлелиниң хуралынга ол айтырыгны чугаалаштывыс.
Школаларга өөреникчилер сыңышпастаанының, чаа объектилерни тударының болгаш эргилээн өөредилге черлериниң капитал септелгезиниң айтырыын сайгарарын чоокку үеде эгелээр даалганы өөредилге сайыды Алексей Храмцовка даастым. Ынчангаш ону республикада уруглар садтарының тудуунуң шыңгыы контролюндан эгелээр херек. Социал объектилерни ажыглалга киирериниң хуусааларын сагывас чорук болбас ужурлуг. Хуусааларны сагываанын федералдыг деңнелге канчаар-даа тайылбырлаары болдунмас. Байдалдың шыңгыызын харыысалгалыг эштер угаап билир, бо чылдың төнчүзүнде бистиң уругларывыска чаа садиктер ажылдап эгелезин дээш, шупту чүүлдерни кылыр ужурлуг” — деп бижээн.
Суван МОНГУШ.
Александр ЕНЗАКТЫҢ тырттырган чуруктары.
#Тываныңбаштыңы #Тудуглар #Уругларсадтары #Тыва #Тува #Шынсолун #Тывадыл #Тывамедээ #Tuva #Shyntuva
