Чаа-Хөлдүң төп кожуун эмнелгезиниң бичии уругларның соматика салбырының капиталдыг септелгези доозулган. Ону Кадык камгалалының баштайгы эмчи дузазын алыр черлерни чаартыр программа езугаар кылган.
Бичии уругларның соматика салбырының оран-савазы 1984 чылда кожуун эмнелгезиниң халдавырлыг аарыглар корпузу кылдыр туттунган турган. Ынчан аңаа 20 оруннуг уругларның соматика салбырын ажыткан. Ол үеден бээр чаңгыс-даа капиталдыг септелге кылдынмайн турган. Бо чылын улуг хемчээлдиг капиталдыг септелгени үстүнде адаанывыс Кадык камгалалының программазының ачызында кылып дооскан.
Сагындырып каар чүүл, шак ындыг капиталдыг септелгени Бай-Тайга, Чеди-Хөл, Улуг-Хем, Таңды кожууннарның уруглар поликлиникаларында болгаш салбырларында чорудуп турар.
Чаа-Хөлде уругларның соматика салбырынга капиталдыг септелгени чорудары-биле “Атлант” КХН-биле күрүне керээзи 8998, 77 муң рубльге чардынган. Ниитизи-биле оран-саваның дээвиирин часкаш, катап чаарткан, соңгаларын солаан, одалга төвүнде болгаш канализация системазын бүрүнү-биле чаарткан, шалазын солаан болгаш өске-даа кылыр ужурлуг планда кирген ажылдар шуптузу кылдынган.
Бо хүнде салбыр чырык, чылыг, бүгү-ле чаагайжыды кылдынган байдалда ажылын уламчылап эгелээн. “Салбырывыс ишти оранчок чырый берген-дир. Уругларның настр-хөөнү безин бедик, өөрүшкүлүг, а ол байдал чаштарның кадыы дүрген быжыгып, сегииринге эң-не кол чүүл-дүр” — деп, кожууннуң уруглар эмчизи Ч. Дыртык-оол хүлээнген ажылынче бедик хей-аът көдүрлүүшкүннүг чаарттынган оран-саваже ажылдап кирип тура, демдеглээн.
#Тываныңкадыккамгалаляамызы #Чаа_хөлкожуун #Капиталсептелге #Тыва #Тува #Шынсолун #Тывадыл #Тывамедээ #Tuva #Shyntuva
