Прокурорнуң хыналдазы
Кызылдың бир чурттакчызының дилээ-биле прокурор хыналдазын эрттирген соонда, чээрби сес кижи чаа бажың алган.
Россияның Чиңгине прокурорунуң оралакчызы Дмитрий Демешинниң хууда хүлээп алыышкынынга чурттаар аргажок аварийлиг бажыңының дугайында ол дыңнадып, ооң эрге-ажыын камгалаарын дилээн.
Хамаатының дилээнге хамаарыштыр прокурорнуң чогуур хыналдазының үезинде, өске улустарның эрге-ажыын база хажыдып турары билдинген. Ооң түңнелинде чээрби сес кижи чылыг, чырык чаа бажыңнарже көшкен.
РФ-тиң Чиңгине прокурорунуң СФО-да оралакчызы бо чылдың тос айларының дургузунда 230 кижини хүлээп алган. Сибирьниң аңгы-аңгы булуңнарында чурттап турар кижилерниң хоойлу ёзугаар эрге-ажыын камгалаары-биле хыналдаларны чоруткан.
Прокурорларның киржилгезиниң ачызында Томск хоорайга инвалид улуска машина тургузар черни, Алтай край биле Новосибирск областың биче суурларында кудумчу чырыын кылып, суурлар аразында автобус аргыжылгазын тургускан. Хакас Республика биле Иркутск областа суг-дамчыдар объектилерниң аварийлиг байдалын чайладып, херимнерин кылган, Омск хоорайның кезек кудумчуларын асфальтылаан, хөй квартиралыг бажыңнар чанында бокту үндүр сөөртүп дажыглаан.
Назы четпээн кижиниң, инвалид улустуң эрге-ажыын камгалаарының дугайында дилеглер база бар болган. Оларның аразында Тыва Республиканың дөрт чурттакчызының дилээ-биле Суг-Аксы суурнуң «Дииңчигеш» уруглар садының ясли бөлүүнге бичии чаштарга олуттарны, Кызылда чурттап турар инвалид бичии уругнуң херек эм-домун хандырып берген.
Хамаатыларның эрге-ажыын үрээн чоруктарны чайладып, оларның эрге-ажыын долузу-биле хандырып бээрин РФ-тиң Чиңгине прокурорнуң оралакчызы Д.В.Демешин боду хынап көрүп турар.
РФ-тиң Чиңгине прокуратуразының СФО-да эргелели.
Р.ДЕМЧИК очулдурган.
#РФ_тиңчиңгинепрокурору #Прокурорхыналдазы #Дмитрийдемешин #Тыва #Тува #Шынсолун #Тывадыл #Тывамедээ #Tuva #Shyntuva
