Украина, Донецк биле Луганск областарда тускай шериг операциязыныӊ эгелээни дээш Россияныӊ рыногундан чоруурун чарлаан даштыкы компанияларныӊ барааннарын садып алырындан тываларныӊ 47 хуузу ойталаан.
Тываныӊ чурттакчыларынга шак ындыг айтырыглыг опросту СуперДжоб компаниязы 2022 чылдыӊ март 3-4 хүннеринде чорудуп турган.
Россияда бизнезин хаапкаш, чоруп турар даштыкы компанияларныӊ барааннарын оон соонда катап чедип келир-даа болза, садып албас мен дээрзин республикада беш дугаар кижи бүрүзү чугаалаан.
«Россияже оларныӊ катап эглип келиринге удур мен!», «Чоруй барзын!», «Чуртувустуӊ бүдүрүкчүлеринге таарымчалыг байдалды тургузар үе шагда-ла келген!», «Кыдаттыӊ оларга дөмейлештир бүдүрген барааннары шупту улуска четчир» - деп, олар сагыш-сеткили хөлзеп, харыылаан.
Россияныӊ барааннарыныӊ аразындан тып шыдавас чүүлдерин, тодаргайлаарга, даштыкы чурттуӊ автомашиналарын, электроника барааннарын бо таварылгада садып алыр дээрзин хоорайжыларныӊ 27 хуузу айыткан.
Тываныӊ чурттакчыларыныӊ 33 хуузу «Рынокка чүнү-даа мурнай чугула чүүл бүдүрүкчүнүӊ политиктиг үзел-бодалы эвес, а барааннарныӊ өртээ болгаш шынары» деп санап турар. А 20 хуузу бо айтырыгга хамаарыштыр бодунуӊ тодаргай туружун илередип шыдаваан.
Опроска киришкен аныяктарныӊ (34 хар чедир) 53 хуузу Барыын чурттарныӊ бүдүрүкчүлериниӊ барааннарын олар катап чедип келирге, садып алыр бис дээн.
45 хардан өрү назылыг тываларныӊ 55 хуузу Россияга ажылдавас бис дээш чоруй барган компанияларныӊ барааннарын шуут сатпас, азы чамдыызын садып албас бис деп харыылаан.
«Катап чедип келирге, тоовас мен» дээн улустуӊ 56 хуузу эр, а 43 хуузу херээжен улус болган.
СуперДжоб компанияныӊ парлалга албаны
Р. Демчик очулдурган
