Чурттакчы чонга төлептиг амыдыралды хандырары – кол сорулга болганда, чылдыӊ-на социал төлевирлерниӊ хемчээлин өстүрүп турар. Февраль айда тускай доктаал-саавыр, хоойлу ёзугаар пенсия болгаш пособиелерниӊ хемчээли көвүдээр.
📢ПЕНСИЯ 8,6 ХУУ ӨЗЕР
2022 чылдыӊ январь 1-де пенсияны 5,9 хуу өстүрген. Ынчалза-даа Президент В. Путин оларны эде санааш, өстүрерин саналдаан. Өстүрген акшазы инфляцияныӊ деӊнелинден бедик кылдыр санаш, пенсияны 8,6 хуу өстүрер деп түӊнээн.
Россияныӊ Күш-ажыл яамызыныӊ санаашкыны-биле алырга, пенсия ортумаа-биле 18 муӊ 500 хире рубль болур. Ынчангаш февраль айда пенсияныӊ немешкен 8,6 хуузун санап бээр.
📢ИЕ КАПИТАЛЫНГА 8,4 ХУУ ӨЗЕР
Ниити аъш-чем, идик-хеп болгаш өске-даа чүүлдерниӊ өртээниӊ өскенин барымдаалааш, ие капиталын 8,4 хуу өстүрген. Бо чылын ие капиталыныӊ хемчээли бирги уруунга – 524,5 муӊ, а ийигизинге 168,6 муӊ рубль. Ие капиталыныӊ сертификадыныӊ эӊ улуг хемчээли 693,1 муӊ рубль болур.
📢УРУГЛАР ПОСОБИЕЗИ ӨЗЕР
Февраль айда бичии уруглар пособиезин база херек кырында өскен өртектерни барымдаалап, 8,4 хуу өстүрген. Төрүттүнген чаш уруу дээш чаӊгыс катап алыр пособиениӊ хемчээли -20 473 рубль, уруун 1,5 харлыынга чедир азырап турары дээш ай санында алыр пособиениӊ эӊ адаккы хемчээли – 7 678 рубль.
📢ДЕКРЕТ АКШАЛАРЫНЫӉ ХЕМЧЭЭЛИН ӨСТҮРГЕН
Чиик-чаагай божуп-чиигеп алган болза, (божуур мурнунда 70 хонук, божаан соонда 70 хонук) ниити 140 хонуктуӊ декрет акшазыныӊ эӊ биче хемчээли – 63 932, 4 рубль, а эӊ улуг хемчээли – 360 164 рубль болур;
Бир эвес божуп-чигээр үезинде, кадыыныӊ аайы-биле нарын байдалдарга таварышкан болза, (70+86) -156 хонуктуӊ декрет акшазыныӊ эӊ биче хемчээли – 71 238, 96 рубль, а эӊ улуг хемчээли – 401 0325,6 рубль болур;
Ийис чаштарлыг болза, декреди 194 хонук болур. Божуур мурнунда 84 хонук, божаан соонда, 110 хонук кылдыр санаар.
Ниити 194 хонуктуӊ декрет акшазыныӊ эӊ биче хемчээли – 88 592, 04 рубль, а эӊ улуг хемчээли – 499 084,4 рубль болур;
Бир эвес ажылдаан стажы алды айдан эвээжевес болза, иштиг турган болгаш божуур үезиниӊ декрет акшазын ажыл төлевириниӊ эӊ адаккы хемчээли-биле санаар.
Регион бүрүзү ажыл төлевириниӊ эӊ адаккы хемчээлинге, азы шалыӊынга район коэффициентизин немей санаар.
Р. ДЕМЧИК белеткээн.
