Эрткен неделяда Таңды кожууннуң Сой суурда республиканың туберкулезка удур диспансеринге эмнедип турган уругларның аразынга ук албан чериниң медицина ажылдакчызындан коронавирус өөскүп үнгени билдингенин ТР-ниң кадык камгалал сайыдының бирги оралакчызы Долаана Куулар дыңнаткан. Ол ажылдакчы ийи катап covid-19-ка удур тарылганы эрткен турган.
– Аарыгның бир дугаар им-демдектери билдинип келгенде, диспансерниң удуртулгазы Росхереглелхайгааралче дыңнаткан. Ол-ла дораан аарыг ажылдакчыны ажылындан кызыгаарлаан. Санаторийге турган улустуң шуптузундан думчуктан болгаш боостаадан анализти алган. Түңнелинде covid-19 илерээн. Уруглар шупту эмчи шинчилгезин катап база эрткен. Оларның үжүнүң анализи халдавырлыг аарыгны бадыткаан. Уругларны дораан республиканың уруглар эмнелгезинде чыттырып, аңгылаан. Ниити байдалы ажырбас, аарыгны чиик хевирге эртип турар деп болур.
Уруглар эмнээр албан чери болганда ында кадыкшылының байдалы кошкак уруглар бар деп билир бис. Ынчангаш аңаа турган уругларның шуптузундан, аарыгның им-демдээ чок-даа болза, санаторийниң эмчизи-биле чоок харылзажып турган болурга, анализтерни алган. Республиканың эпидемиологтуг төвү шинчээн соонда, 16 уругга аарыг илерээн.
Санаторийниң бодунга аарыг улусту аңгылаар черни болгаш кадык улуска обсерваторну организастаан. Уруглар шупту эмчилерниң хайгааралында. Амдыызында аарыгның кандыг-даа им-демдектери илеревээн. Эгезинде республиканың уруглар эмнелгезинге аңгылап чыттырган бичии уругларның байдалы эки. Оларның ийизин дедир чорудупкан. Бирээзин ада-иези аппарган. Ынчап кээрге, Сойда амгы үеде 16 халдавырлыг, 47 коронавирус хамчыы илеревээн уруглар бар. Уруглар диспансерниң болгаш коронавируска удур эмнээшкинни база ап турар.
Халдавыр эмчи ажылдакчызындан тараан болган соонда, эпидистелге ажылы доозулган. ТР-ниң Кадык камгалал яамызының удуртукчузу чогуур хемчеглерни чоруткан. Росхереглелхайгааралдың негелдезинге дүүштүр профилактика ажылдарын санаторий чорудуп, санитарлыг дүрүмнерни сагып турган. Диспансерге ажылдап турган улуг улусту база шуптузун шинчилээн соонда, беш халдавырлыг аарыглыг кижи илерээн. Оларны база ажылындан кызыгаарлаан.
Ниитизи-биле 64 уруг санаторийге эмнедип турган.
#Кадыккамгалал #Таңдыкожуун #Сой #Коронавирус #ТМГмедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews
