Коронавирус хамчыктыг аарыгның “омикрон” штаммының өөскүп эгелээни-биле республика девискээринге массалыг хемчеглер эрттирерин 2022 чылдың апрель 1-ге чедир хоруур деп чарлаан.
Бөгүн Чазакка болган Аппарат хуралынга ол дугайында Тываның кол санитар эмчизи Людмила Салчак чарлаан. Массалыг хемчеглерге спортчу оюннар, өг-бүлениң хөй кижи чыып демдеглээр байырлалдары, шажын-чүдүлгеге хамаарышкан байырлалдар болгаш бичии уруглар ойнаар залдар, компьютер залдары, дүнеки дыштанылга клубтары хамааржыр.
Шак ындыг кызыгаарлаашкынныг негелделер эрткен чылда база турган. Эпидбайдал чүгээртей бээрге, ону соксатканын шупту билир. Амгы үеде хоруглуг негелделерниң катап база эгелээниниң чылдагааны, коронавирустуң өске хевирлеринге көөрде, дүрген чыпшыныычал “омикрон” штаммының Тывада көстүп келгени болуп турар. Ол хевирден аараан чаңгыс кижи хары угда 12 кижини аартып болурунуң айыылы тургустунган.
Ынчангаш муниципалитеттерге бо аарыгга удур шыңгыы хемчеглерни алыры-биле, ажылды күштелдирерин дааскан. Бо талазы-биле чонга тайылбыр ажылын уламчылап, ковидке удур дүрүмнү хажытпайн, эмчиниң камгалал масказын кедер режимни сагыырын, албан черлери болгаш хөй кижи чыглыр черлерге доктаамал санитарлыг арыглаашкынны чорудуп турарын база катап сагындырар. Оон аңгыда, ОРВИ-ден аараан ажылдакчыларын эчизинге чедир эмнедип албаан шаанда, ажылче кыйгырбазын удуртукчуларга сагындырып турар.
Оперштабтың дыңнадыы-биле алырга, Кызыл хоорайга чаңгыс хүнде коронавирустан аараан 39 кижи илерээн. Эрткен неделяга деңнээрге, 78 кижи хөй болуп турар.
Тываның Чазаа аарыг улус чыдар орун фондузун улгаттырар ажылды дүргедедир сорулганы салган. Ол ышкаш вакцинацияны чон аразынга ам-даа калбартыры негеттинип турар.
Крещение болгаш Шагаа байырлалдарын соксаткан чылдагаанын шын билип алырын чурттакчы чондан дилеп турар. Бо байырлалдарны онлайн хевирге эрттирерин удуртукчуларга дааскан.
Кызылдың мэриязының парлалга албаны.
#Росхереглелхайгаарал #Омикрон #Эпидбайдал #Тыва #Тува #Шынсолун #Тывадыл #Тывамедээ #Tuva #Shyntuva
