Тываның волонтерлары Covid-19-биле демиселде 08.02.2022 Февраль 7-ниң хүнү-биле алырга, Covid-19-тан 20 882 кижи аараан, эрткен неделяга деңнээрге 5 536 кижи хөй деп, Кадык камгалал яамызы дыңнаткан. 19 689 кижи амбулаторлуг эмнээшкинде.
Республиканың аңгы-аңгы өөредилге челериниң волонтер студентилери эмчилерге дузалажып, бажыңнарында аарыг кижилерже үнүп эгелээн. Оон аңгыда бо аныяк кижилер #МыВместе деп бүгү-российжи бот-дузаламчы акциязының идепкейлиг киржикчилери. Волонтерлар каттыжыышкынының ажылын ТР-ниң Аныяктар херектериниң талазы-биле агентилел удуртуп, эки турачыларны хууда камгалал дериг-херекселдери-биле хандырып турар.
Аарыг кижилерни бажыңнарында хайгаарап турар амбулаторлуг звенонуң эмнелге организацияларынга транспорт чедишпес. Яамылар болгаш ведомстволар боттарының автопарктарындан 30 машинаны хүннүң-не үндүрүп турза-даа, ол чедишпес. Тываның Кадык камгалал яамызы эмчилерни аай-дедир сөөртүрүнге дузалажырынче чолаачыларны кыйгырган. Волонтер шимчээшкининиң активчилери бир дугаарында-ла харыыны бергеннер. Бөгүнде Тыва Республиканың ХУФ аныяктарының активчилери, Тываның күрүне университединиң студентилери база Россияның Кызыл крестиниң Тыва Республикада эки турачылары автоволонтерлап турар.
Студентилер Call-төпте операторлап, аарыг кижилерге эмнер чедирип, бот-хоргадалда шимчей албас база назылап кыраан кижилерге дузалажып турарлар. Волонтерлар хүннүң-не 2000 кыйгыртыгны хүлээп, ажылдап, 30 хире аарыг кижилерге эмнерни чедирип берип турар. Бирги эки турачылар аразында Тываның эмчи колледжизинден волонтерлар база Тыва Республиканың эмчи-волонтерларындан эмчилер ажылдап турар. Колледж студентилери Call-төпте, Республиканың уруглар эмнелгезинде, Кызыл кожууннуң төп эмнелгезинде хаара туттунган.
Тываның күрүне университединиң төөгү, көдээ ажыл-агый, физика-математика факультеттериниң студентилери эмчилер чыда калбаан. Оларның одуруунче өске факультеттерден, педагогика институдундан, университеттиң колледжизинден волонтерлар каттышкан. ТывКУ-нуң «Дуза» студент отрядының дайынчылары Кызыл хоорайның хөй кижилер чыглыр черлеринге, социал адыр объектилеринге, кадык камгалалының база өөредилге албан черлеринге санитарлыг арыглаашкын ажылдарында дузалажып турар.
Республиканың ортумак профессионал өөредилге черлериниң сургуулдары волонтерлар шимчээшкининде хөйү-биле киржип эгелээн. Волонтер-эмчилерни база ТывКУ-нуң студентилерин Кызылдың транспорт техникумунуң, Олимпийжи курлавыр училищезиниң, Тываның Көдээ ажыл-агый техникумунуң, Кызылдың экономика болгаш эрге-хоойлу техникумунуң, Тываның тудуг техникумунуң, Информастыг технологиялар техникумунуң сургуулдары хүннүң-не солуп турар.
#МыВместе акция-биле пенсионерлерге дузалажыр кылдыр бүгү республикада 253 кижини хаара туткан. Эки турачылар эм-таң болгаш аъш-чем дажыжарынга дузалажып турарын сагындыраал. Дузаламчы алыксап турарлар 8-901-675-63-60 телефонче, азы 8-800-200-34-11 дугаарлыг тускайлаан изиг шугум телефонче халас долгааш, чагыгны арттырар. ТывКУ-нуң волонтерлары #МыВместе бүгү-российжи шимчээшкин чорудуу-биле «Помощь 65+» деп боттарының акциязын чарлаанын демдеглезе чогуур. Тываның дээди өөредилге чериниң волонтерларындан дуза дилээр дизе, 89996865633 дугаарже долгаар.
Тыва Чазактың парлалга албаны
