Рубрикалар

АПТЕКА БААЗАЗЫНЫҢ ӨНЧҮЗҮН САДЫПКАН

Тыва Республиканың Арбитраж судунуң 2017 чылдың май 4-те хүлээп алган шиитпири-биле ТР-ниң «Республиканың мөөңнеп садар аптека баазазы» күрүнениң унитарлыг бүдүрүлгезинге хамаарыштыр буураашкын (банкротство) процедуразы эгелээн турган.

Барык 4 чыл ажыр чорудуп келген буураашкын процедуразы бүгү чадаларын эрткеш, бо хүннерде колдуу дооступ турар.

Буураашкынга таварышкан бүдүрүл­гелерниң, хууда сайгарлыкчыларның болгаш хамаатыларның өнчү-хөреңгизин садар «Дистанциялыг садыг төвү» электроннуг садыглаашкын шөлчүгежинге (ЭТП-электронная торговая площадка) бо чылдың сентябрь 30-де ТР-ниң «Республиканың мөөңнеп садар аптека баазазы» КУБ-туң арткан өнчү-хөреңгизин 10 сая 515 муң рубль өртекке конкурс башкарыкчызы садыпкан.

Ол өнчү-хөреңгиже дараазында чуртталга оран-савазы эвес болур бажың-балгат кирип турар:

1. Кызыл хоорайда Оюн Күрседи кудумчузунда 71 дугаар бажыңның 13,14,15 дугаар өрээлдери. Ниити шөлү – 94,2 дөрбелчин метр;
2. Чадаана хоорайда Ленин кудумчузунда 49 дугаар бажың. Ниити шөлү – 245,6 дөрбелчин метр;
3. Кызыл хоорайда Оюн Күрседи ку­дум­чузунда 71 дугаар бажыңның 1-12,16-26,31,32 дугаар өрээлдери. Ниити шөлү – 726,8 дөрбелчин метр. База-ла ол адрес­те 154 дөрбелчин метр шөлдүг аңгы турар бажың.

Бо хире хөй өнчү-хөреңгини Красноярск хоорайдан хууда сайгарлыкчы Дмитрий Владимирович Лысенко ажык-чарлыг садыглажыышкынга киришкеш, хоойлу езугаар садып алган. Тывадан болгаш Россияның өске-даа регионнарындан ооң-биле чижип, ол садыглажыышкынга кым-даа киришпээн.

Ажык садыглажыышкынга садыпкан өнчү-хөреңгиниң эге өртээ 20 сая 613 муң 289 рубль 91 көпеек турда, кым-даа албас боорга, Буураашкын дугайында 127 ду­гаар федералдыг хоойлу езугаар ооң өртээ чада аайы-биле бадып-ла органы ол. Эге өртек чартыынга чедир бадып кээрге, Красноярск хоорайдан садып алыкчы тыптып келгеш, садыглажыышкынга киришкен чаңгыс борбак садып алыкчы болган. Аңаа немей өске садып алыкчы тыптып келген турган болза, олар аразында чижип, 10 саяга чедир бадып келген өртекти дедир өстүрүп чижир турган.

Ол хире чиик өртекке бадып келген, ынча улуг шөлдүг, турар чери кончуг эки, сайгарлыштыг бажың-балгатты Тывадан садып алыр бүдүрүлге-даа, сайгарлыкчылар-даа, хууда кижилер-даа тывылбайн барганы кончуг хомуданчыг.

Шаг үе белен эвес-даа болза, таанда-ла ону садып ап шыдавас хире кылдыр хөй националдыг тыва чон, тывалар ядараваан болгай бис.

Сайгарлыкчылар, хууда кижилер мындыг садыглажыышкыннарга садып турар өнчү-хөреңгини тогбас апарган чүве болза, чазак-чагырга республика, хоорай, кожуун бюджеттеринге тускай акшаландырыышкынны бадылап алгаш, буураашкынга таварышкан бүдүрүлгелерниң, сайгарлыкчыларның өнчү-хөреңгизин чүге дедир күрүне өнчүзүнче киир чиик өртек-биле садып албас деп. Ынчаар болза, чаа тудуг тударындан, ындыг белен оран-сава, бажың-балгат садып алганы, септелге ажылын кадар-даа болза, дөмей чиик боор. Хоорайларда чаа тудуг тудар хостуг чер база тывылбас болгай.

Удавас Кызыл хоорайның шуут төвүнде, шаанда «Улуг-Хем» рестораны турган, сөөлүнде Тыва Республиканың «Улустуң банкызы» апарган оран-саваны банк буурааны-биле база садып-саарар. Ол оран-саваны аптека баазазын садыпканы ышкаш, өске черден келген сайгарлыкчылар чиик өртек-биле садып апаар болза, база кончуг хомуданчыг боор.

Бо талазы-биле чазак-чагырга черле боданганы артык эвес.

Мерген АНАЙ-ООЛ.

#Экономика #Өнчү_хөреңги #Садыглажыышкыннар #Тыва #Тува #Шынсолун #Тывадыл #Тывамедээ #Tuva #Shyntuva

Предыдущая запись
ӨРЕГЕ БҮРҮЗҮНГЕ КАРТОФЕЛЬ
Следующая запись
БУЯННЫГ ЫЯШ
Меню