Рубрикалар

АЪШ-ЧЕМ ӨРТЭЭН ЧИИГЕДИРИН НЕГЭЭН

Прокурорнуң хыналдазы
Тываның 16 муң ажыг чурттакчызының эрге-ажыктарын камгалаанының дугайында медээни РФ-тиң Сибирь Федералдыг округта чиңгине прокуратуразы дыңнадып турар.

Тыва Республиканың прокуратуразының эгелекчи саналы-биле регионнуң чазаа 2020 чылдың декабрь 29-та доктаал хүлээп алган. Ол доктаалда Кыдыкы Соңгу чүк болгаш аңаа деңнештирген девискээрлерде чурттап чоруур чоннуң амыдыралынга ужур-дузалыг чамдык барааннарның өртээнге немээр акшаларының кызыгаар хемчээлин доктаадырының дугайында айтып каан. Ылаңгыя кызыгаарлыг хуусаа дургузунда ажыглаар аъш-чем аймааның өртек-үнезин хөлүн эрттир өстүрбейн, өйүнде хемчээлинге тургузарынга ол ажыктыг болган.

Республиканың чедери берге кожууннарында чурттап турар хамаатыларның эрге-ажыктарын камгалаар сорулга-биле прокурорлар хыналданы чорудуп, чугула херек аъш-чем аймааның өртектерин үргүлчү хынап көрүп турганнар.

Мөңгүн-Тайга биле Тожу кожууннарның прокурорлары шак ындыг хыналда үезинде, кызыгаарлыг хуусаалыг барааннарга – чигир, хендир үзү, дагаа чуургазы, сүт, далган, вермишель, морковь, яблоко – бо бүгү аъш-чем аймааның өртээнге хуу сайгарлыкчылар 30 хуудан оранчок ажыр немеп ап турганын илереткен.

Мөңгүн-Тайганың Мугур-Аксы, Тожунуң Ий, Адыр-Кежиг, Тоора-Хем суурларда садыг-саарылгалыг алды хуу сайгарлыкчыга өртек тургузарының дугайында хоойлужудулганы хажыткан чүүлдерин чайладырының дугайында негелде бижиктерни прокурорлар берген.

Прокурорларның хыналдазының түңнелинде, аъш-чем аймааның өртээниң 20 хуузун чиигеткен. Кыдыкы Соңгу чүк болгаш аңаа деңнештирген девискээрлерде чурттап чоруур 11628 кижиниң эрге-ажыктарын ынчаар камгалаан.

Өртектер өстүрген улустарга хамаарыштыр РФ-тиң Административтиг хоойлу-дүрүм хажыдар чоруктар дугайында кодекстиң 14.6 чүүлүнүң 1-ги кезээ-биле херектерни оттурган. Суд өртек тургузар чурум хажыткан дугайында херектерни сайгарып көрүп турар.

Любовь БАУНТРОК, эргелелдиң улуг прокурору.

Р. ДЕМЧИК очулдурган.

#Прокурор #Өртектер #Ыраккыкожууннар #Тыва #Тува #Шынсолун #Тывадыл #Тывамедээ #Tuva #Shyntuva

Предыдущая запись
БҮРҮНҮ-БИЛЕ 82 165 КИЖИ ТАРЫТКАН
Следующая запись
МӨӨРЕЙ УЛАМЧЫЛАП ТУРАР
Меню