Булуң-Бажында  10 дугаар «Эзирлерниң уязы»  дооступ турар

Эрзин кожууннуң Сылдыс суурда «Эзирлерниң уязы» деп төлевилел-биле шывыглыг спорт залы доос­тур чоокшулап турар.

Кожуунда уругларның спорт школазының директору Баир Идамның чугаалааны-биле, тудугну бүгү чон-биле бо чазын тудуп эгелээн. Бо хүнге чедир кым чүнүң-биле шыдаар дузалажып турар: тудугжуларга изиг чемин эккеп, кылып берип-даа турар, чамдыктары дыштаныр хүннерде оларның-биле кады ажылдап турар. Сес тудугжу док­таамал ажылдап турар: «Эрзин кожуун «Эзирлерниң уязы» чаа губернатор төлевилелиниң мөөрейинге тиилеп алганнарның бирээзи». Тываның Баштыңы Шолбан Кара-оолдуң бистиң чонувусту көңгүс өске чуртталгаже углап турары мени кайгатты. Мындыг спорт залдарның туттунуп турары дээрге спорттуң, кадык амыдыралдың, угаан-бодалдың талазынга күштүг идиг деп санап турар мен.

Тываның Баштыңы 2020 чылда Парламентиге кыйгырыынга республикага спорт залдарның тудугларының дугайында бодунуң эгелекчи саналын чугаалаанын сагындырып каалы. Амгы үеде Сылдыс суурдан аңгыда, «Эзирлерниң уязы» Өвүрнүң Дус-Дагда, Бай-Тайганың Хемчикте, Сүт-Хөлдүң Ак-Дашта, Барыын-Хемчиктиң Эрги-Барлыкта, Бии-Хемниң Хүтте, Таңдының Успенкада, Чөөн-Хемчиктиң Хайыраканда, Улуг-Хемниң Эйлиг-Хемде, Чодураада туттунуп турар. Республика бюджединден 18 000,0 муң рубль-биле акшаландырган. Чаңгыс бичии спорт залдың өртээ 1 500,0 муң рубль. Ангар хевирниң 4 500,0 муң рубль. Спорт залдың 8 булуңнуг ыяш өг ышкаш туттунуп турары онзагай. Спорт зал бажыңы 2 аңгы оран-савадан тургустунар – спорт зал болгаш уштунар өрээл, тренерлер өрээли аңгы турар. Оон аңгыда, хостуг хүреш, самбо, дзюдо залы база турар.

Спорт залдар бүдүн суурнуң улуг-даа, бичии-даа чонунуң хостуг үезин ажыктыг эрттирер культурлуг сорунзазы болуру чугаажок. Бо төлевилел кожуун чагыргаларының мөөрейге киржир күзелин илередир, спорт залдарны электри энергиязы, чылыг болгаш чаагайжыдылга-биле хандырар хүлээлгени алган быжыг, доктаамал, идегелдиг команда-биле ажылдап билирин хынаар кыйгырыг болуп турар. Аңаа чагырганың, бүгү чоннуң буянныг сорулгазын мөөңнээр — боттарының ажы-төлүнге спорт залды тудуп бээр, шыырак билиглиин көргүзери.

Раля АРАПЧАА.

 

Меню