Рубрикалар

ЧАА ЧЫЛ БҮДҮҮЗҮНҮҢ ХӨЛЗЭЭЗИНИ

Кырганнар бажыңынга Чаа чыл байырлалының бүдүүзүнде өөрүнчүг, хөлзээзинниг ажылдар эгелээр. “Демография” национал төлевилелдиң иштинге Хову-Аксы суурда социал албан чериниң удуртулгазы назыдап-кыраан кижилерниң болгаш инвалидтерниң байырланчыг сеткил-хөөнүн көдүрери-биле янзы-бүрү хемчеглерни чорудуп турар.

— Чогум-на Чаа чылдың байырлалдарында назыдап кыраан кижилерге сагыш човаашкын, кичээнгей биеэгизинден артык тоң чугула херек боор. Бистиң албан черивисте аңаа белеткел баш буруңгаар-ла эгелей бээр. Байырлал менюзун баш буруңгаар-ла боданып, оран-саваны чараш шинчи киир каастап, эрттирер хемчеглерниң тускай сценарийин ажылдап кылып турар бис. Дыка хөй кырган-авалар болгаш кырган-ачалар байырлалдың белеткелинге идепкейлиг киржип, өң-баазын ойнаарактарны, гирляндыларны асчып, күүседир ырыларын болгаш шүлүктерин база катап шээжилеп турарлар – деп, Хову-Аксында бажың-интернаттың директору Долаана Дивии чугаалап турар.

Бо хүннерде интернаттың девискээринде ажыл-иш хайымналган. Ол ажылдарда интернаттың бүгү техперсоналы хаара туттунган. Кышкы тоол оранын чогаадып кылыры-биле олар Элегес хемден улуг-улуг бузунду доъштарны эккелгеш, оларны уран чүүлдүң ёзулуг-ла чогаадыглары кылдыр хуулдуруп турарлар. Ам безин дараазында чылдың “2022” деп саны белен. Маңаа аалдап келгеннерни бажың-интернатче кирер эжик аксынга Соок-Ирейниң болгаш Хар-Даңгынаның доъш дүрзүлери уткуп алыр, шеверлер оларның овур-хевирин доозуп турарлар.

Албан чериниң таңныылы Вадим Монгуш элээн хөй чыл улаштыр доъштан кылган хоорайның тудуунга киржип турар. Бо ажылга ооң хамаарылгазы мырыңай онзагай: «Чогум-на мээң бодап алган бодалымны бөгүн амыдыралга боттандырып тур бис. Агаар-бойдус-даа дугуржуп, чугаалажып каан-биле дөмей, ажыл-иш-даа чогунгур чоруп тур” — деп, Вадим Владимирович өөрүп чугаалай-дыр.

Чаа чыл бүдүүзүнүң хөлзээзини кижи бүрүзүн – бажың-интернаттың чурттакчыларын-даа, ооң ажылдакчыларын-даа хөме алган. Катчып алгаш олар байырлалдың шивизин шимеп турарлар.

А. ХЕРТЕК белеткээн.

#Демография #Националтөлевилел #Хову_аксы #Тыва #Тува #Шынсолун #Тывадыл #Тывамедээ #Tuva #Shyntuva

Предыдущая запись
КАДЫ АЖЫЛДААР ДУГУРЖУЛГАНЫ ЧАРГАН
Следующая запись
Чаа чыл бүдүүзүнде Тываның Баштыңы Владислав Ховалыг Улуг-Хем кожуунга четкен
Меню