Рубрикалар

Covid-19-тан аараан улустуң саны көвүдеп турар

Регионнуң Кадык камгалал яамызының медээзи-биле алырга, эрткен хонукта 98 кижи аараан, ооң мурнунда хүнден 15 кижи хөй. Эң-не хөй өзүлде Кызыл хоорайда демдеглеттинген – 39 кижи, Кызыл кожуунда – 20.

Аараан кижилерниң хар-назынын көөр болза, 17 харга чедир – 36 уруг, ортумак назылыг – 47 кижи. Эмнээшкинде 1348 аарыг кижи бар, оларның 367-зи – стационарларда, поликлиникаларда – 981. 285 чаштар чыдар эмнелгелерде.

Аараан уруглар саны көвүдеп турарындан, 70 оруннуг салбырны ажыдар деп шиитпирлээн. Уруглар салбырындан аңгыда, республиканың халдавырлыг аарыглар эмнелгезинде ийиги госпитальды ажыткан. Ол ышкаш Covid-19-тан аараан иштиг херээженнер эмнээр кылдыр, Кызылдың Гагарин кудумчузунда Божудулга бажыңынга 80 оруннуг акушер-гинекология стационарын ажыдар. Оон аңгыда Титов кудумчузунда терапия салбырын «кызыл зонаже» белеткеп, 300 орунну салыр.

Аарыгның хенертен көдүрүлгени-биле, эмчилер уругларның чыдар эмнелгезинче, республиканың 1 дугаар эмнелгезинче база консультация-диагностика поликлиниказында гериатрия хүндүскү салбырынче планныг хүлээп алыышкыннарны түр када соксаткан. Поликлиникалар амдыызында анаа чурум-биле ажылдап турар.
Эм-таң аймаа бир айда, камгалал дериглер – үш ай хире үеже чедер.

ТР-ниң кадык камгалал сайыды Анатолий Югай эмчилер бирги кыйгыртылгаже үнүп, аарыг кижилерни эргип турар болганда, ооң-биле чергелештир соңгаарладып болбас эмчи дузазының планныг үнүүшкүннеринни кылып, бажыңнарже кыйгыртып турар болганда, чогуур санныг транспорт-биле хандырарын республиканың оперативтиг штавындан дилээн. Бо үеде 50 санныг транспорт херек.

Оперативтиг штабтың шиитпири-биле, Кызыл хоорайның девискээрин хандырарынга эрге-чагырга органнарының база ооң удуртулгазында организацияларның транспортун хаара тудар. Муниципалитеттерге хамаарыштыр кожуун чагыргалары автомашиналарны тускайлаар шиитпирни үндүрер.

#Кадыккамгалаляамызы #Коронавирус #ТМГмедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews

Предыдущая запись
Дыл болгаш чогаал шактарын хевээр арттырар
Следующая запись
КЕДИЛИГ АЖЫЛ-АГЫЙЖЫ УЖУРАЖЫЛГАЛАР
Меню