Рубрикалар

ЭЛЕКТРИЖИДЕРИН РОССИЯНЫӉ ЧАЗАА ШИИТПИРЛЭЭН

Шушенск – Туран – Мерген – Кызыл деп улуг күчүлүг электри шугумунуӊ тудуун инвестиция планынга 2022 чылда киирериниӊ дугайында РФ-тиӊ Чазаа шиитпирлээн дээрзин Тываныӊ Баштыӊы Владислав Ховалыг социал четкилерде бодунуӊ арынынга бижээн:

«Чаа электри дамчыдар шугум, Тывага үлетпүр комбинаттарын ажыдарындан аңгыда, чурттаар оран-сава тудуунуӊ шөлүн 1 млн. дөрбелчин метр чедир көвүдедир арганы бээр. Ооң дузазы-биле Тожуга чедир чырыкты шөйүп, оон тура электрижидилгени эгелээш, Каа-Хемниӊ тайгаларын таварты Кунгуртугнуӊ бодунга чедир уламчылаар. А ол черлер дээрге турист бүрүзүнүӊ күзели болгай.

Чазактыӊ шиитпири биске 11 миллиард рубльди анаа бергенин магадылавайн турар – маӊаа кылыр ажылывыс четчир. Бисте бар эӊ кол чүүлүвүс дээрге Владимир Владимирович биле Сергей Күжүгетовичиниӊ амы-хууда деткиишкини-дир. Бо төлевилелде олар бистиӊ-биле кады».

Чаа электри шугумун кожуптарга, республиканыӊ элээн каш берге айтырыглары шиитпирлеттине бээр. Кызылга алды микрорайонну тудар. Инвестициялыг төлевилелдерниӊ ачызында чаа ажылчын олуттар тыптып кээр. Бистиӊ регионувуска ажылдаар инвесторларның үндүрүглери республика бюджединче кирер. Электрилиг чылыдылгаже шилчиир. Тере-Хөл кожуунга чедир орукту дүрген тударынга болгаш Каа-Хемни кежилдир көвүрүг кылырынга идиг болур.

📢ТЫВАНЫӉ ЭНЕРГЕТИКАЗЫ

 Шушенскиниӊ кол подстанциязындан улуг күчүлүг электри дамчыдар чаа шугумну Кызылга чедир тудуп кылыптарга, Тыва оон чүнү алырыл?

 Ол дээрге Кызыл хоорайга алды чаа микрорайон туткаш, чурттаар оран-сава тудуунуӊ шөлүнүӊ хемчээлин 1 млн. дөрбелчин метр чедир көвүдедири-дир.

 Ол дээрге Тожу кожууннуӊ Доора-Хем, Ырбан суурларын төпчүткен электри хандырылгазынга кожары-дыр.

 Ол дээрге Тере-Хөл кожуунга чедир орукту кылыры, Каа-Хем кежер көвүрүг тудары-дыр.

 Ол дээрге инвестициялыг чаа төлевилелдер ачызында чаа ажылчын олуттарны ажыдары-дыр:
«Ак-Суг» – 2000-3000 ажылчын олут
«Кара-Белдир» – 700 ажылчын олут

 Ол дээрге электрилиг чылыдылгаже шилчиир арганы тургузары-дыр. Оон ышсыг агаар эвээжей берип болур.

 Ол дээрге электри хандырылгазыныӊ бүзүрелдиг болгаш шынарлыг апаары-дыр:
Бажыӊга ажыглаар электрилиг техника болгаш электроника өрттенип каары болдунмас.

 Ол дээрге регионда ажылдап турар инвесторларныӊ боттуг үндүрүглерин республика бюджединче киирери-дир.

 Ол дээрге чаа чүс чылда Тываныӊ хөгжүлдезиниӊ чаа чадазы-дыр

 Ол дээрге дизельдиг оттулар чүүл-биле ажылдап турар «ЛУНСИН» комбинаттыӊ арыг агаарже хоралыг ыш үндүрерин эвээжедири-дир.

Р. ДЕМЧИК белеткээн.

#Энергетика #Электри #Шушенскстанция #Тыва #Тува #Шынсолун #Тывадыл #Тывамедээ #Tuva #Shyntuva

Предыдущая запись
ХӨМҮР АЙТЫРЫЫН ЭЧИЗИНГЕ ЧЕДИР ШИИТПИРЛЭЭН
Следующая запись
КОРРУПЦИЯГА ХАМААРЫШКАН 650 ХАЖЫДЫЫШКЫННЫ ИЛЕРЕТКЕН
Меню