Эмчилерге төлевирлер

Кадык камгалал сайыды Артыш Сат июль айда чедир төлеттинмээн эмчилерге деткимче акшаны шилчидип турарының дугайында дамчыткан.

Тыва Республиканың Кадык камгалал яамызының агар-санындан 312 эмчи ажылдакчыларынга – Перинаталдыг төптүң, Барыын-Хемчик, Улуг-Хем, Бай-Тайга эмнелгелериниң деткимче төлевирлери шилчиттинген. Эмчи ажылдакчыларынга идиг болур немелде акшаны шилчидип турары-биле чооку үеде агар-саннарже кирип эгелээр. Июль айда коронавирус инфекциязының көвүдээни-биле, немей оруннар тургузар дээш 4 эмнелгениң 312 ажылдакчыларынга 38,72 млн рубль түңнүг деткимче акша чедир төлеттинмейн барган. Июль айда эмнелгелерде оруннар саны 1800 чедир өскен. Бо хүнде коронавирус инфекциязын эмнээринге 364 орун бар, ооң иштинде республианың кожууннарында 40 орун.

Ниитизи-биле эмнелге ажылдакчыларынга идиг кылдыр федералдыг бюджеттен 1 683 548 млн рубль, оон аңгыда, Россия Федерациязының Чазааның 2020 чылдың апрель 2-ден № 415 доктаалы-биле 789,637 млн рублей көрдүнген. Апрель айда 415 дугаарлыг доктаал ёзугаар 25 эмнелгениң 945 ажылдакчыларынга, май айда 33 эмнелгениң 3715 ажылдакчыларынга, июньда 34 эмнелгениң 5057 ажылдакчыларынга деткимче төлевирлер угланган.

Июль айда 35 эмнелге чериниң 5313 ажылдакчыларынга 151, 495 млн рубль түңнүг деткимче акша төлеттинген. Апрель айда 6 эмнелгениң 146 ажылдакчыларынга, майда 23 эмнелгениң 1158 ажылдакчыларынга, июньда 25 эмнелгениң 2121 ажылдакчызынга деткимче акша төлеттинген. Коронавирус инфекциязынга удур ажыл дээш июль айда 25 эмнелгениң 2254 ажылдакчызынга 240, 696 млн рубль төлеттинген.

Чыжыргана СААЯ

 

Меню