Рубрикалар

ФАП ТУДУУНГА АРЫСКАНЧЫЛАРНЫҢ ҮЛҮҮ

Улуг-Хем кожууннуң Арыскан суурунга фельдшер-акушер пунктузунуң чаа  оран-савазын эрткен чылын “Кадыкшыл” национал төлевилел иштинче кирип турар “Баштайгы эмчи дузазын чедирер черлерни чаартыры” регионалдыг төлевилел ёзугаар туткан.

Амгы үеде чаа ФАП чоннуң база бир доктаамал чыглыр чери болу берген, ылаңгыя төптен эмчи специалистери кээп турар үелерде, кижи көвүдей бээр. Ооң эргелекчизи Любовь Дайлакпанның кол сорулгазы – суурунуң чонунуң кадыының байдалын экижидери, ылаңгыя тускай эртемниг эмчилер кээп турар үелерде, ырак-узак черер чоруп турбайн, бодунуң-на суурунга эмчилерни эртип алыры-биле чонун мөөңнээри.

Ниитизи-биле фельдшерниң учёдунда 732 арысканчылар кирип турар, ооң иштинде бичии уруглар-210, улуг улус- 432,  келир үеде ава болур назы-харлыг херээжен улус- 114. Бир чылда ФАП-че 14700 арысканчылар барып турар.

ФАП-тың эргелекчизи Любовь Семёновна 1983 чылда Кызылдың эмчи училищезин дооскаш, Арысканга үзүктел чок ажылдап эгелээнинден бээр ам 39 чыл болуп турар.  Ол үе дургузунда суурунуң чурттакчы бүрүзүнүң кадыының байдалын эки билир апарган болгаш оларга кандыг эмчи дузазы хереглеттинип турарын кезээде хыналдада ап, ажылдап турар.

“ Чаа туттунган оран-савага ажылдаары кончуг эптиг-даа, өөрүнчүг-даа. Ооң мурнунда чылдарда кудуктан суглап, печка одап,  ажылдап турган болзувусса, ам чаагайжыды туттунган фельдшер-акушер пунктузу ажылдаарынга дыка эптиг-дир. Чон база чырык, чылыг, чаа дериг-херексел-биле дериттинген эмчи черинче чоннуң кээри база көвүдээн” – деп Любовь Семёновна чугаалаан.

Шынап-ла, көдээ суурда ФАП республикада туттунган 27 изиг-соок суглуг, чырык, чылыг, делгем өрээлдерлиг дээрзин эмчи дузазы дилеп келген чон демдеглеп турар.  Чаа ФАП-та фельдшер, акушер болгаш процедура кабинеди бар. Ында бо хүнде эргелекчизи, акушер эмчи, аштакчы болгаш одакчы ажылдап турарлар.

Суурнуң чурттакчызы Любовь Сат ФАП-ка ханының базыышкынын хынадып бо-ла кээр. “Көдээ суурнуң чурттакчыларынга таарыштыр кылган бо эмчи черинге кээрге, сагышка эки, ылаңгыя кышкы үеде, чылыг, чырык. Кажан, коронавирус хамчыктыг аарыг кедереп турган үеде, бистиң суурувустуң бо фельдер-акушер пунктузу хондур ажылдап, чонга эмчи дузазын чедирип турганын демдеглевес арга чок” –деп, ол чугаалаан.

Арысканчыларның  коронавируска удур тарытканының көргүзүглери эки. Даңзы ёзугаар 12 кижини тарыыры арткан. Олар шупту өөренип чоруткан улус болуп турар.

Демдеглеп каар чүүл, ФАП тудуунга Арысканның чурттакчылары кончуг идепкейлиг киришкен. Р улус-тудугга, херээжен чон агитбригадаларга үстүп алгаш, тудугжуларга аъш-чемни белеткеп берип турган. Шак ындыг демниг чорук чаа ФАП-тың тудуун чаңгыс ай дургузунда доозарынга идиг болган.

#Путин#Президент#Инициативыпрезидента#Нацпроекты#ВладиславХовалыг#Неделянацпроектов_в_Туве

Предыдущая запись
МЕГЕ МЕДЭЭЛЕРГЕ БҮЗҮРЕВЕҢЕР!
Следующая запись
“ЛУНСИННИҢ” ЭМНЕЛГЕЛЕРГЕ БЕЛЭЭ
Меню