Рубрикалар

КОРОНАВИРУСТАН ААРААННАРНЫҢ САНЫ КӨВҮДЭЭН

Сөөлгү хонуктарда лабораторлуг тестээшкин аргазы-биле Тывада COVID-19-тан аараан 59 чаа таварылга илереттинген. Ооң эң хөйү – 21-и Кызыл хоорайда илерээн, эрткен хонуктарга көөрде, ийи таварылга хөй. Бо бүгү-биле чергелештир аарыгның эң берге хевири – тромбоэмболиядан (хан-дамырының тывылган черинден үстүп, хоорулганындан ооң хан дамчыдылгазын дуглай чыдып алыры) аарааннарның саны көвүдээн дээрзин республиканың Кадык камгалал яамызы демдеглеп турар. Амгы үеде чыттырып эмнедир салбырларда 75 кижи аар байдалдыг чыдар.

Мындыг медээ-дыңнадыгны коронавирус халдавырының нептерели-биле демисел чорудар оперштабтың ээлчеглиг хуралынга кадык камгалалының сайыды Анатолий Югай дыңнаткан. Ооң медеглээни-биле алырга, Кызылдың чыттырып эмнээр госпитальдарында 383 кижи эмнедип турар, ооң иштинде бадыткаттынган им-демдектиг кижилер – 345, уруглар – 40, иштиг-сааттыг херээженнер – 10.

Өкпени кылымал арга-биле тындырар аппаратта 24 кижини кошкан, сыкыртыр, эм дамдыладыр эмнээшкинде – 2 эмнедикчи бар. COVID-шинчилелдер болгаш эмнээшкиннер төвүнүң учедунда 178 аарыг кижи турар, ооң иштинде 64 уруг база 65-тен өрү назылыг 9 назылап кыраан кижи бар.

Долу тарылганы 90 083 кижи эрткен. Чамдык муниципалитеттерде тарылга талазы-биле планны 80 хуу күүсеткен. Бо талазы-биле Кызыл хоорай база Барыын­Хемчик кожуун хожудап, чавыс көргүзүглүг болуп артпышаан.

Сөөлгү дөрт неделяның дургузунда ук халдавырлыг хамчыктан аарыыр чоруктуң деңнелиниң чавызаанын өөренип көргеш, уругларның ойнап-хөглээр залдарынга болгаш хөй-ниитиниң чемненилге черлеринге бо хүннер­де күштүг болуп турар шеглел-кызыгаарлаашкыннарны кезик-чамдыктап уштурунуң дугайында санал-оналды республиканың Баштыңынга киирип болур арга тыптып келгенин Росхереглелхайгааралдың Тыва Республика талазы-биле эргелелиниң удуртукчузу Людмила Салчак дыңнаткан. Санитарлыг негелделерниң чайгылыш чок сагылгазында база ажылдакчыларның 80 хуузу тарыдып, QR-кодтарны ажыглап тургаш, дыштанып, чемненип келгеннерниң эрттирилге чурумун хандырганда, ол объектилерни ажыдып болур. Ооң-биле чергелештир хөй-ниитиниң чемненилге черлери чемненип келгеннерни залдар 50 хуу долдунган турда хүлээп алыры хевээр арткан. А ёзулалдар залдары тарылганы эрткен 100-тен эвээш эвес кижи турда ажылдап болур апаар. Ёзулалдар залдарының болгаш өске-даа ойнап-хөглээр залдарның ажылдаар шактарынга хамаарыштыр шеглел-кызыгаарлаашкын чурумун ужулбас, олар чүгле 23.00 шакка чедир ажылдаар эргелиг деп Людмила Салчак демдеглээн.

Ындыг болганда, ойнап-хөглээр залдарның, хөй-ниитиниң чемненилге черлериниң база ёзулалдар залдарының ажыл-чорудулгазын катап эгелээриниң айтырыы сайгарлыкчыларның бүгү негелделерни сагыырының беленинден, оларның болгаш чемненип келгеннерниң бот-харыысалгазындан долу хамааржыр деп, Александр Брокерт түңнээн. Чазак Даргазының ора­лакчызы ТР-ниң Социал хөгжүлде болгаш үлетпүр яамызынга республиканың Юстиция яамызы-биле катай Росхереглелхайгааралдың кииргени санал-оналын өөренип көөрүн дааскан. Күрүнениң кол санитар эмчизиниң санал-оналын көрүүшкүнүнүң түңнелдерин оперштабтың дараазында хуралынга чарлап дыңнадыр.

Артур ХЕРТЕК.

#Эпидбайдал #Кадыккамгалалы #Коронавирус #Тыва #Тува #Шынсолун #Тывадыл #Тывамедээ #Tuva #Shyntuva

Предыдущая запись
КАДЫ АЖЫЛДАЖЫЛГА АЙТЫРЫГЛАРЫН БЫЖЫГЛААН
Следующая запись
ЧОНГА ОДААР ЧҮҮЛ ХАНДЫРЫЛГАЗЫ
Меню