Рубрикалар

МААДЫРЛАРНЫҢ АТТАРЫН МӨҢГЕЖИДЕР

Ада-чурттуң Улуг дайынынга немец нацисчи фашизмни тиилээниниң 77 чылынга тураскааткан концерт үезинде чугаазынга Тываның Баштыңы Владислав Ховалыг Төрээн чуртту даштыкы дайзыннардан камгалаарынга Тываның чонунуң киирип келген төөгүлүг ужур-дузазын демдеглээн.

Тыва эки-турачылар Ада-Чурттуң Улуг дайынының чылдарында Украинаның хоорай, суурларын немец фашистерден хосташканын сагындырып, амгы үеде база республиканың дайынчылары украин нацизмден Украинаны камгалаарынга эрес-дидим киржип турарын айыткан. Маадыр өгбелеривистиң аттарын ыдыктыы-биле Тываның чону сактып чоруурун Владислав Ховалыг демдеглээш, амгы үениң маадырларының аттары база төөгүге артар ужурлуг деп айыткан.

Россияның эрге-ажыын камгалап тургаш, маадырлыы-биле чок болган Арсен Чүлдүмнүң адын Чеди-Хөл кожууннуң төвү Хову-Аксы суурнуң чаа кудумчузунга, Таңды кожууннуң Кочетов суурда школага ооң доозукчу сержант Виктор Оюннуң адын тыпсыр шиитпирни тус чер эрге-чагыргалары хүлээп алганын Тываның Баштыңы дыңнаткан. Украинада чоруп турар тускай сорулгалыг дайынчы операция үезинде амы-тынындан чарылган бистиң чаңгыс чер-чурттугларывыс эрес-маадырлыг оолдарывыстың аттарын мөңгежидер талазы-биле хемчеглерни чорударының чугулазын ол чугаалаан.

Украинада дайынчы хөделиишкиннерге эрес-маадырлыг чоруун көргүскен чаңгыс чер-чурттугларывыс шериг оолдарга Тыва Республика чергелиг “Тиилелге Хүнү” (“День Победы”) тураскаал медальды тывыскан. Анаа дайынчы Орлан Александрович Кыргыс, сержант Шеверле Викторович Кыргыс, биче сержант Ангыр Романович Ооржак, анаа дайынчы Артыш Олегович Сат, прапорщик Долаан Николаевич Сат, майор Захар Александрович Тарасов, улуг прапощик Херел Шолбанович Хурагандай, биче сержант Төмүр-Шулуу Викторович Хертек оларга “Тиилелге Хүнү” (“День Победы”) тураскаал медальдарны Тываның Баштыңы Владислав Ховалыг тывыскан.

Тыва Республика чергелиг “Тиилелге хүнү” тураскаал медальды Ада-чурттуң Улуг дайынының хоочуннары Георгий Васильевич Абросимов биле Кирилл Иванович Марков оларга, 1956 чылда Венгрияга дайынчы хөделиишкиннерниң киржикчизи Анатолий Михайлович Крутиковка, Ленинград бүзээлелин бичиизинде шыдажып үнген, “Ленинград бүзээлелиниң чурттакчызы” хөрек демдээниң эдилекчизи Борис Борисович Подгорныйга Владислав Ховалыг тывыскан.

Ада-чурттуң хоочун камгалакчыларынга болгаш амгы салгалдың камгалакчыларынга кадыкшылды, чедиишкиннерни, тиилелгелерни Тываның Баштыңы Владислав Ховалыг күзээн.

Ш. Моңгуш.

Предыдущая запись
Украин нацизмге удур демиселдиң маадырларының аттары-биле Тывага кудумчуларны адаар
Следующая запись
Тываның Баштыңы Владислав Ховалыгның байыр чедириишкини
Меню