Рубрикалар

QR-КОД ЧОКТА ХӨЙ-НИИТИ ЧЕРИНЧЕ КИИРБЕС

Тывага хөй кижи чыглыр культура-массалыг болгаш спортчу хемчеглерже, хөй-ниитиниң чемненилге черлери, хөй ажыл-чорудулгалыг төптерже (МФЦ) QR-код (ковидке удур тарыткан деп бадыткал) чокта кирери болдунмас апаар.

Тываның Чазаанга болган ээлчеглиг Аппарат хуралынга QR-код талазы-биле айтырыгны эки өөренип көөрүн ТР-ниң Экономиктиг сайзырал болгаш үлетпүр база ТР-ниң Чурагайлыг сайзырал яамы­ларынга дааскан. Ол ажылды чогударынга хыналда пунктуларын тургузарын организастаары, оларны тускай дериг-херексел-биле четчелээри көрдүнген.

Ол ышкаш ол-ла хуралга республиканың Кол санитар эмчизи Людмила Салчак ажыл чок улустуң эвээш тарыдып турарын демдеглээн. Тываның Баштыңы Владислав Ховалыг ол угланыышкынныг ажылды күштелдирерин ТР-ниң Күш-ажыл болгаш социал политика яамызынга даас­кан. Ажыл чок хамаатыларны даңзы ёзугаар илереткеш, кижи бүрүзүнге чедип тургаш, тарыдарынче кыйгырары чугула деп демдеглээн.

Республикада октябрь 17-ге чедир вакцинаның бирги компонентизи-биле 115 409 кижи тарыткан, 59,9 хуу доза вакцина чарыттынган. Ниитизи-биле вакцинацияның планының күүселдези амдыызында 69,6 хуу (115 409 кижи) болза-даа, ортумак российжи көргүзүгден 27,9 хуу бедик болуп, ниити российжи рейтингиде бистиң республикавыс бешки одуругда чоруп турар.

Вакцинаның бирги компонентизи-биле дараазында кожууннарда чон хөй тарыдып турар: Чаа-Хөл – 87,9 хуу, Мөңгүн-Тайга – 87 хуу, Өвүр – 85,7 хуу.

А вакцинация шүшпең эртип турар кожууннар: Тере-Хөл – 43,8 хуу, Барыын-Хемчик – 62,3 хуу, Эрзин – 64 хуу, Кызыл кожуун – 66,1 хуузу тарыткан. Кызыл хоорайның чурттакчыларының чүгле 62,6 хуузу тарыткан.

Вакцинаның бирги компонентизи-биле тарыткан 115 409 кижиниң 19 246 кижи азы 64,6 хуузу 60 хар ажа берген улус болуп турар. Россия деңнели-биле алырга, тарылга кылдырткан 60 хар ашкан улуг назылыг улустуң саны-биле 85 регион аразында бистиң республика дөрткү одуругда турар.

Кызыл хоорай, Кызыл кожуун база Чеди-Хөлде 60 хардан өрү назылыг улустуң тарыдып турары эвээш болуп турар.

Мөңгүн-Тайга, Тожу, Тере-Хөл кожууннарда улуг назылыг улус вакцинацияны кончуг идепкейлиг эртип ап турар.

Республика девискээринде COVID-19-туң кандыг байдалда келгенин СтопКоронавирус деп порталда картадан көрүп болур.

Кижиниң кадыы бодунуң холунда болганда, халдавырлыг аарыгга удур тарыдып алырын утпаңар!

Бистиң корр.

#Кадыккамгалалы #Вакцинация

Предыдущая запись
АЮШ МОНГУШ – ТЫВАНЫҢ УЛУСЧУ УЧАСТОК ШАГДААЗЫ
Следующая запись
ЁЗУЛУГ ТЫВА ӨГЛЕРНИҢ ОНЗАГАЙЫН ЧИДИРБЕС ДЭЭШ
Меню