Рубрикалар

РОССИЯНЫҢ ЧОННАРЫНЫҢ ЧАҢГЫС ДЕМИНИҢ БАЙЫРЛАЛЫ

Бөгүн, июнь 12-де, Россия хүнүн – күрүнениң эң кол байырлалын Тывага демдеглеп эрттирген. Россияның чоннарының найыралының, чаңгыс деминиң байырлалын найысылал Кызылдың Арат шөлүнге эрттирген.

Россияның болгаш Тываның күрүне туктарын көдүртүр езулал соонда, “Бис – хамаатылар бис” деп акция-биле российжи хамаатыларга паспорттарны байырлыг байдалга тывыскан.

Аныяктар өргээзинге өгленишкен аныяктарны база юбилейлээн өг-бүлелерниң бадыланчыр чараш езулалдарын байырлыг байдалга организастаан.

Бөгүнгү байырлал, хамчыктыг аарыгның уржуундан, бичии кызыгаарлыг-даа болза-даа, өң баазын шарлар, туктар туткан улуг-биче чон чыглып, аныяктарның организастааны флеш-мобка, оюн-тоглаага идепкейлиг киржип турарын көөрге байырланчыг шинчи кирип, өөрүшкүнү оттурар. Чыылган чон аразында узбек, армян, киргиз, таджик диаспораларның чоннары национал идик-хевин кедип алгаш келгени, оларның боттарының культуразын, езу-чаңчылдарын үнелеп, бүгү чоннар-биле демниг чоруун көргүзүп турары-дыр.

Арат шөлүнге, байырлыг концерт болур мурнуу чарыында, Тываның Чазааның, яамыларның удуртукчулары чыылган чонга Россия хүнү-биле байыр чедирип чылыг-чымчак сөстерни илереткен.

В. И. Ленинниң тураскаалының чанынга “Россияның алдарлыг маадырлары!” деп концертти организастаан. Концерт 55-ки даг-адыгжы бригаданың үрер хөгжүм оркестриниң оюн-көргүзүү-биле эгелээн. Күрүнениң “Саян” ансамблиниң, “Найысылал” бөлүүнүң, Орус культура төвүнүң ыраажылары, самчылары, сураглыг база аныяк “сылдыстар” солун концертти кызылчыларга болгаш найысылалдың аалчыларынга бараалгаткан.

Россия хүнү “Совет Тываның 5 чыл” стадионунга тыва хүреш маргылдаазы-биле доозулган.

Чуруктарны Буян Ооржак тырттырган.

Предыдущая запись
Следующая запись
РОССИЯ ХҮНҮ — КҮРҮНЕНИҢ ЭҢ КОЛ БАЙЫРЛАЛЫ
Меню