Рубрикалар

РОССИЯНЫҢ КАДЫК КАМГАЛАЛ САЙЫДЫ ТЫВАНЫ ДЕТКЭЭН

Тываныӊ Баштыӊыныӊ албан-хүлээлгезин түр үеде күүседип турар Владислав Ховалыг чурттуӊ найысылалынга барып, республиканыӊ чугула ажыл-херээн сүмележип дугуржуп турарыныӊ дугайында дыӊнаткан:

– Москвадан өөрүнчүг медээлерни силерниӊ-биле үлежийн. Бистиӊ республикавысты Россияныӊ кадык камгалалыныӊ сайыды Михаил Альбертович Мурашко деткээн. Биоматериалдарныӊ диагностиказын кылыр болгаш шинчилээр ажылдарны дарый чорудар микробиологтуг айыыл­ чок талазы-биле 2-ги чергениӊ чаа ла­­бо­раториязыныӊ акшаландырыыш­кынын Тывага берген. Медицинаның 21 чаа мобильдиг комплектизин садып шиӊгээдиринге үндүрүп берген акша-хөреӊгиниӊ ачызында диспансеризацияга оон-даа хөй улусту хаара тудуп болур бис. Чедип алыры берге черлер Тывада эвээш эвес, ынчангаш регионнуӊ шупту чурттакчылары эмчиниӊ шынарлыг ачы-дузазын ап шыдаар болуру-биле, шак ындыг деткимче биске дыка херек. Тываныӊ чонунга чаа МРТ аппарады чугула херегин сайытка чугааладым.

Оон аӊгыда, элээн хөй социал объек­тилерге капиталдыг септелге негеттинип турар. Кызылда Республиканыӊ 1 дугаар эмнелгезиниӊ поликлиника бажыӊын чаартып кылырыныӊ дугайын­да аарыг кижилер доктаамал бижип турар. Республиканыӊ бичии уруглар эмнелгезиниӊ тудуун база сайгарып чугаалаштывыс. Тываныӊ чонунуӊ тарылгазы-биле холбашкан айтырыгларны база сайгарып көрдүвүс.

Берге чүүлдерниӊ шуптузун баш бурунгаар дарый шиитпирлеп алыр кол адырларныӊ бирээзи – кадык камгалалы. Россияныӊ Кадык камгалал яамызы мени дыӊнааш, деткиир аргаларны өөренип көөр болган.

Чыжыргана СААЯ

белеткээн.

Предыдущая запись
ЫРЖЫМ БУЛУҢДА ЧАА ЭМНЕЛГЕ
Следующая запись
«ЧУРТТААРЫНГА ТААРЫМЧАЛЫГ ХООРАЙ ХҮРЭЭЛЕҢИН ТУРГУЗАРЫ»
Меню