Рубрикалар

Серенот башкыны май 7-де сөөлгү оруунче үдээр

Тывага шажын-чүдүлге катап эглип келиринге улуг үлүг-хуузун киирген, эриг баарлыг болгаш хүндүткелдиг лама-башкы, тыва эртемден, шинчилекчи, эмчи, эмнелге дугайында көвей эртем номнарының автору база Тыва Республиканың кадык камгалалының алдарлыг ажылдакчызы, «Күш-ажылчы шылгарал» медаль болгаш «Тываның Россияга каттышканындан бээр 100 чыл ою» юбилейлиг медальдың эдилекчизи Станислав Күжүгетович Серенот бо чылдың май 5-те, үр эвес аараанының соонда, өске делегейже чорупканының дугайында бүгү Тываның чонунга улуг кажыыдал-биле дыңнадыр аар үүлени күүсетпишаан, өөнүң ишти Нина Даш-ооловнага, уругларынга, хөй санныг төрел-дөргүлүнге, чоок кижилеринге ханы кажыыдалды илередип, оларның ажыг-шүжүүн үлежип тур мен.

Станислав Күжүгетович Серенот 1949 чылдың октябрь 4-те Улуг-Хем кожууннуң Шагаан-Арыг хоорайга төрүттүнген. 1973 чылда Кызылдың эмчи училищезиниң фельдшер салбырын кызыл дипломнуг дооскаш, Хайыракан суурга эмнелге салбырын эргелекчилеп, кожуун эмнелгезиниң дүрген дуза станциязынга ажылдап турган. 1981 чылда Кызылдың күрүнениң башкы институдунуң биология факультедин кончуг эки өөредилге-биле доозуп алгаш, удуртукчузу Коңгар-оол Э.Т.-биле эм оъттар шинчилээр эртем ажылынга киржип турган.

Эрткен чүс чылдың 80 чылдарының төнчүзү, 90 чылдарның эгезинде Тывага сарыг шажын катап тургустунуп, тыва чон чүдүлгеже эглип кээринге амы-хууда улуг үлүг-хуузун киирген.

Улуг-Хем кожууннуң Хайыракан суурга совет үе соонда Тывага баштайгы дуганнарның бирээзин ажыткаш, аңаа чонга ачы-буянын чедирип чораан. Ыдыктыг Хайыракан дааның дагылдазын Он-Кум оваазынга 1992 чылдың май 1-де Тываның баштайгы Камбы-ламазы Сандык Казак башкы болгаш Бурятиядан чалаткан лама-башкы Бальжанов Биликто-биле кады эрттиргеннер. Ооң ачызы-биле Ыдыктыг 14-кү Далай-лама башкы 1992 чылдың сентябрь айда Тывага кээп чорааш Хайыракан суурга чедип, Ыдыктыг Хайыракан дааның Он-Кум оваазынга чүдүкчү чон-биле ужуражып, улуг ном номчуп, ыдык черни база катап ыдыктаан.

Адазының талазындан улуг хам уктуг, авазының талазындан улуг лама-башкы салгалы боор, чон аразында кысказы-биле Серенот-башкы деп хүндүлеп адаар, Станислав Күжүгетович Серенот хенертен аар аараан хүннеринге чедир Кызылда эмнелге төвүнге тыва, төвүт, кыдат улусчу эмнээшкиннер аргаларын ажыглап, чонга улуг буянын чедирип келген.
Хүндүлүг Серенот башкының үр эвес аар аарыг уржуундан чок болганы тыва чонга дыка улуг чидириг болган.

Станислав Күжүгетович Серенотту Кызыл хоорайның Московская кудумчузунуң 101 дугаар бажыңының 7 дугаар подъездизинден май 7-де эртенгиниң 9-10 шак аразында, ажаар чери Улуг-Хем кожууннуң Хайыракан сумузунче сөөлгү оруунче үдээр.

Хүндүткелдиг, буянныг Серенот башкывыс дарый катап төрүттүнүп кээр болзунам! Өршээ-өршээ!

М. АНАЙ-ООЛ.

Предыдущая запись
Роман Поманисочкин: «Бистиң Президентивис – Россияның хамаатыларының эрге-ажыын делегей деңнелинде төлээлеп чоруур нацияның лидери».
Следующая запись
Duet.SS — угбашкылар брендизи
Меню