Рубрикалар

УЖУРАЖЫЛГА КОНЧУГ ҮНЕЛИГ БОЛГАН

Тываның Баштыңының албан-хүлээлгезин түр үеде күүседип турар Владислав Ховалыг Москва хоорайга сургакчылап турар үезинде чурттуң Президентизи-биле ужуражылгага демдеглеттинген айтырыгларны шиитпирлээр ажылдарны чорудуп турар. Ол Россияның экология болгаш бойдус курлавырларының сайыды Александр Александрович Козлов болгаш Чер иштиниң байлааның ажыглалының талазы-биле федералдыг агентилелдиң удуртукчузунуң албан-хүлээлгезин түр үеде күүседип турар Евгений Игнатьевич Петров-биле ужурашканын социал четкиде бодунуң арынында бижээн:“Тыва бодунуң ажыктыг казымалдары-биле байлак. Ол бодунуң бойдузунуң ызыгуур дамчып келген байлаа-дыр. Ону канчаар ажыглаары чүгле бистен, боттарывыстан хамааржыр. Базым бүрүзүн боданып алгаш, шупту деңнелдерге сайгарып, чугаалажып тургаш, шиитпирлээр хөлчок харыысалгалыг, нарын айтырыг-дыр.

Инвесторларга бистиң казымал байлаавысты көргүзер мурнунда федералдыг тургузугнуң удуртукчулары-биле база катап сайгарып көөрү эргежок чугула. Бистиң республикага бо күзүн кээр дугайында Александр Козлов-биле дугуруштувус. Тываның бойдузунуң байлаан чогумчалыг ажыглаар дугайында айтырыгга ооң талазындан кичээнгей биске кончуг харыысалгалыг болуп турар.

Экология талазы-биле бистиң берге айтырыгларывыстың бирээзи – хөө. Харалаан, “Арыг агаар” федералдыг төлевилелге кызыгаарланып, экологтуг байдалын экижидеринге дузалажып болур, агаары ыштыг 12 хоорайның аразынче Кызыл кирбейн турар. Бо нарын айтырыгны боттарывыс шиитпирлээривис болдунмас. Келир чылын “Арыг агаар” төлевилелин калбартып тура, Кызылды эң баштай төлевилелче киирерин экология болгаш бойдус курлавырларының сайыды-биле дугуруштум. Кадык чүү-даа чүведен чугула болгай. Ынчангаш бүгү документилерниң белеткел ажылын ам дораан кылып эгелээр кылдыр Экология яамызының мурнунга сорулганы салып тур мен.

Тывага чаа инвестициялыг төлевилелдер херек деп, Президентиниң салган сорулгазының дугайында база утпаалыңар. Кыдыындан арын-нүүр барымдаалавас болгаш харын-даа «сергедиптер» көрүш кажан-даа шаптык болбас. Бо талазы-биле Россияның дорт инвестициялар фондузунуң чиңгине директорунуң бирги оралакчызы Анатолий Александрович Браверман-биле ужуражылга кончуг үнелиг болган”.

#Владиславховалыг #Экология #Москвахоорай #Тыва #Тува #Тувамедиагрупп #Тывадыл #Тывамедээ #Tuva #Shyntuva

Предыдущая запись
САЯНА ЧЫКАЙ – «МААДЫР-ИЕ» ХӨРЕК ДЕМДЭЭНИӉ ЭДИЛЕКЧИЗИ
Следующая запись
ДООЗАЗЫ ДЭЭДИ ӨӨРЕДИЛГЕ ЧЕРИНГЕ ӨӨРЕНИР
Меню